Një drekë modeste e një peshkatari që ka ndeshur rrugës për në Divjakë e ka mahnitur biznesmenin dhe ish-Presidentin kosovar, Behgjet Pacolli.
Ai është kënaqur aq shumë nga mikpritja e një njeriu të thjesht sa e ka shpërndarë edhe me të tjerët drekën e tij. Me anë të një postimi në Facebook, Pacolli duke shkuar në Divjakë, ku ka një projekt gjigand që e ka planifikuar ta ndërtojë në Luginën e Karavastasë thotë se kishte shijuar një ushqim të mrekullueshëm të natyrës, në një tryezë të thjeshtë, por me plot shpirt.
Ja çfarë shkruan Pacolli në Fb:
Bukë, kripë e zemër! Gjithë shqiptarët janë bujarë! Në Jug dhe në Veri, në Kosovë dhe Myzeqe e gjetiu.
Në grykë të Shkumbinit, peshkatari Ylli, shpirtgjërë, mikpritës fantastik, nuk na lëshoi të vazhdojmë rrugën drejt plazhit të Divjakës pa u ulur për të ngrënë në sofrën e tij që improvizoi dhe e shtroi për pak minuta.
Madje na tregoi,në mënyrë pak e shumë ironike si votoi në Drenas, pa pasaportë të Kosovës për një parti të madhe të asaj anë.
Ai e ndau me ne bukën, lëngun, specat, qepët e djadhin! Ushqim i mrekullueshëm i natyrës, në një tryezë të thjeshtë, por me plot shpirt,” shprehet Pacolli.
