Byroja e Kuvendit ka përjashtuar deputetin e PD-së Sali Berisha 10 ditë pas deklaratave të djeshme në sallën e Parlamentit.
Byroja, ka pranuar kërkesën e Partisë Socialiste e cila kërkoi të merrej masë ndaj tij pas thirrjeve të tij në parlament. Sipas tyre Berisha ka shkelur rregulloren e Kuvendit dhe Kushtetutën.
Pas vendimit të Byrosë, deputeti i PD-së Edmond Spaho tha se kjo ishte një hakmarrje pasi Berisha bëri denoncoi publikisht Shullazin. Spaho akuzoi maxhorancën si të lidhur me krimin.
“Shumica është e lidhur me krimin e organizuar, po kërkon të fshehë situatën në vend. Ligjin e bën si dëshiron kur ke votat në Byro. Sot në Shqipëri po qeveris krimi. Ky vendim është hakmarrje ndaj Berishës që bëri publike kërcënimet, e që denoncoi Shullazin. Berisha i pari që bëri publik kërcënimin ndaj rektorit. Ngjarje që rezultoi tërësisht e vërtetë. Qeveria bashkëpunon me kriminelët. Duan të largojnë vëmendjen nga situata në vend”, tha Spaho.
Deputeti theksoi se grupi i PD-së do të shqyrtojë qëndrimin e maxhorancës.
“Fillimisht do diskutojmë qëndrimin e maxhorancës. Berisha ka qenë shumë i qartë në deklaratën që ka bërë duke u mbështetur në legjislacionin amerikan. Qeveria nuk mbron qytetarët por bashkëpunon me kriminelët për t’i vënë qytetarët në atë situatë si ngjarjet që u morën vesh. Do diskutojmë në grupin parlamentar dhe do të informoheni për qëndrimin”, u shpreh ai.
Në kërkesën e PS thuhet se Berisha bëri thirrje për armatosje. “Iu bëj thirrje qytetarëve që të armatosen…qytetarët janë të gatshëm që t’ju kundërshtojnë me armë dhe të mos gjeni vrimë ku të futeni…”, thuhet në kërkesën e PS drejtuar Kuvendit.
