Në Hënë mund të ketë pasur jetë në të shkuarën e largët. Bëhet fjalë për rreth 3.5 mld vjet më parë, atëherë kur mbi satelitin tonë kishte aktivitet të ngjeshur vullkanik, që çlironte më pas në sipërfaqe gazra dhe avuj uji.
Ky është konkluzioni i studimit të Universitetit të Shtetit Washington në bashkëpunim me universitetin e Londrës dhe publikuar në revistën shkencore Astrobiologji.
Kërkuesit kanë zhvilluar një punë studimore të detajuar mbi të gjithë gurët dhe pjesët shkëmbore të mbledhura në Hënë nga misionet Apollo, por edhe ato më të mëvonshme. Në to janë konstatuar gjurmë të aktivitetit vullkanik.
Sipas tyre, çlirimet e tyre mund të kenë krijuar domosdoshmërisht pellgje me ujë në formë të lëngjshme mbi sipërfaqe dhe një atmosferë mjaftueshëm të dendur, që ta ruanin të tillë për miliona vite.
Kjo përbën kushtin kryesor për krijimin dhe zhvillimin e jetës theksojnë astrobiologët. Një tjetër faktor që mund të ketë ndikuar në eksistencën e jetës në Hënë është edhe prania e një fushe magnetike në të shkuarën, që mendohet se bënte të mundur mbrojtjen e sipërfaqes nga erërat diellore.
Gjithsesi shkencërët shfaqin dyshime, dhe thonë se ndoshta jeta në Hënë mund të mos jetë krijuar vetë, por të ketë mbërritur nga qielli nëpërmjet rënies së ndonjë meteori.
