Një familje në Tepelenë paguan 33 lekë/m3 për ujin e pijshëm. Por ky çmim duket se do të rritet pas një kërkese të bërë në Këshillin Bashkiak nga anëtarët e majtë. Këtë fakt e ka bërë publik deputeti i Partisë Demokratike, Tritan Shehu, me një status në rrjetin social Facebook. Ndër të tjera deputeti Shehu shkruan se Prokuroria duhet të hetojë spekulimet në ujësjellësin Tepelenë-Memaliaj, të cilat tani do tja faturojnë qytetarëve, duke rritur çmimin e ujit!
Sipas Shehu ky ujësjellës ka një deficit financiar prej 200 milionë lekë si dhe një borxh ndaj OSHEE prej 160 milionë lekë. Shehu shpjegon se Bashkia e Tepelenës është aksioneri kryesor i ujësjellësit, dhe duhet që të japë argument dhe të bëjnë një analizë se pse po kërkohet rritje e çmimit të ujit për qytetarët.
Sipas deputetit ky ujësjellës i ofron një shërbim jo cilësor qytetarëve, qoftë për sasinë ashtu dhe për cilësinë e ujit të shpërndarë. Miratimin e rritjes së çmimit të ujit pa bërë më parë një studim Shehu e konsideron abuzues e në të njëjtën kohë të papërballueshëm për banorët e fshatrave.
