Një pemë e vjetër shekullore, arrë e egër, lartësia e së cilës shkon deri në 50 metra, është duke u prerë nga punonjësit e ndërmarrjes së pastrim gjelbërimit pranë mureve të kalasë në lagjen numër 1.
Trungu i pemës ishte plasaritur duke u ndarë përgjysmë, çka përbënte rrezik për jetën e qytetarëve që kalojnë pasditen në lulishte.
Përgjegjësi i sektorit të gjelbërimit në ndërmarrjen komuale, Hysni Huqi, sqaroi për Durrës Lajm se e vetmja mundësi ishte prerja e një pjese të madhe të pemës për të shmangur ndonjë aksident tek njerëzit.
Shumë durrsakë të vjetër mund të kenë kujtime të çmuara nga fëmijëria e tyre në pemët shekullore, të cilat një nga një po i zhduken qytetit. Ca prej moshës së tyre të vjetër e ca prej dorës së njerëzve, në rrugët e Durrësit vështirë se mund të gjesh qoftë edhe një pemë të vjetër.
