Një zjarr ka përfshirë pyjet e fshatit Arrëz në zonën e Kaçinarës, në Mirditë. Banorët kërkojnë ndihmën e autoriteteve për fikjen e zjarrit, pasi sipas tyre rrezikohen edhe 15 banesa në fshat. Banorët shprehen se deri tani janë djegur mbi 5 hektar pyje, ndërsa flakët janë përhapur me shpejtësi për shkak të erës së fortë.
Si pasojë e zjarrit janë djegur edhe përcjellësit elektrikë në fshat. Deri më tani nuk ka pasur ndërhyrje nga forcat zjarrfikëse për shkak të terrenit malor. Vatra e zjarrit në pyll u konstatua që ditën e djeshme, ndërsa sot ka marrë përmasa më të mëdha.
