Deputetja e Partisë Demokratike Jozefina Topalli, bëri sot thirrje për organizimin e protestave nga opozita në të gjithë vendin, nisur nga rasti i kërcënimit të kandidatit për rektor, Mynyr Koni.
Në një prononcim për gazetarët, ajo tha se këtë gjë ja ka kërkuar edhe kryetarit të PD-së, Lulzim Basha, gjatë mbledhjes së grupit parlamentar.
“Zhvillimet e fundit me kërcënimet që i janë bërë kandidatëve për rektor kanë qenë një tronditje dhe një alarm për situata që nuk janë imagjinuar kurrë gjatë këtyre 25 viteve. Çfarë do të presim? Nëse krimi vendos edhe në universitete, siç është ulur në parlament apo në zyrat e larta të shtetit, ky vend ka marrë fund”, tha Topalli.
Për të shpëtuar nga kjo rrokullisje, vijoi ajo, duhet një zgjidhje e menjëhershme që është kombinimi i protestave me betejën parlamentare.
