Rekorde pa fund për ekipin e futbollit të femrave të Vllaznisë. Përveçse është shpallur kampione katër javë përpara fundit të kampionatit, kjo skuadër po lufton të vendosë disa rekorde, që besojmë se janë të rralla edhe për kampionatet e tjera. Në 15 ndeshjet e zhvilluara deri më tani, ky ekip ka arritur të shënojë plot 113 gola, por çka është më interesantja, ka pësuar vetëm 1 gol, atë nga Apolonia e Fierit, në ndeshjen e fazës së parë. Shifra vërtetë interesante, duke iu shtuar edhe 15 fitoret e arritura në po kaq javë kampionat.
Vllaznia për femra dominon kampionatin shqiptar Ekipi i ndërtuar me shumë kujdes nga presidenti Lazer Matija ka gjashtë vite radhazi që nuk njeh humbje në kampionat dhe ndoshta ky është rekord për “Guiness”. Pavarësisht se tashmë kampionati ka përfunduar për këtë ekip, sa i takon arritjes së objektivit, trajneri Nikolin Leka dhe futbollistet e tij vazhdojnë punën për të tjera arritje. Për momentin, vëmendja është e përqendruar te takimi i radhës, që do të luajë ditën e diel, në fushën “Reshit Rusi”, ndaj Skënderbeut të Korçës. Lazer Matija, presidenti i Vllaznisë së femrave
Kjo ndeshje pritet deri diku me interes, sepse korçarët kanë shfaqur hapur pretendimet, që sezonin e ardhshëm të hyjnë fuqishëm në kampionat, për t’i rrëmbyer titullin kampion Vllaznisë dhe për këtë kanë filluar që tani lëvizjet në merkato, madje edhe në mënyrë të pandershme, duke joshur me oferta të ndryshme vajza të ekipit shkodran, apo dhe ndonjë tjetër. Megjithatë, tek kuqeblutë askush nuk do t’ia dijë për këtë gjë. Skuadra vazhdon me të njëjtin ritëm punën dhe të dielën do t’i tregohet Skënderbeut se kush është ekipi kampion dhe ekipi i rekordeve në Shqipëri.
