Sipas të gjitha gjasave Gjykata Kushtetuese do të jetë e paralizuar jo vetëm për këtë vit por edhe në vitin 2019. Sipas parashikimeve ligjore dhe kushtetuese, organi kryesor që do të bëjë rankimin e kandidatëve për gjyqtar në Gjykatën Kushtetuese, është Këshilli i Emërimeve në Drejtësi, ose KED.
Ky institucion përbëhet nga nëntë anëtarë të cilët zgjidhen me short për një afat një vjeçar. KED aktuale e zgjedhur për vitin 2018 nuk ka funksionuar në pritje përfundimit të procesit të vetingut për të gjithë anëtarët.
Ky proces sipas të gjitha gjasave do të përfundojë në fund të vitit 2018. Me mbarimin e këtij procesi të vetingut deri në fund të vitit përfundon edhe mandati një vjeçar i KED aktuale. Sipas ligjit do të hidhet një short i ri i cili do të përcaktojë një përbërje të re të KED.
Kështu viti 2019 do të fillojë me një KED të re me anëtarë të cilët nuk do të kenë kaluar vetingun, duke përjashtuar ndonjërin që e ka kaluar në vitin 2018 dhe që shorti do ta ricaktojë përsëri për vitin 2019. Kështu viti 2019 do të fillojë edhe me procesin e vetingut të anëtarëve të rinj të KED.
Ky proces sipas të gjitha gjasave dhe ecurisë së hetimit që bën KPK, kërkon një kohë jo më pak se gjashtë muaj. Kështu duke llogaritur se vetingu i tyre do të bëhet në kohë të arsyeshme, themi se procesi do të mbarojë në muajin korrik të vitit 2019.
Por edhe pas mbarimit të këtij procesi duhet të edhe kandidatët për gjyqtar në Gjykatën Kushtetuese të ketë përfunduar procesi i vetingut. Lista e kandidatëve për të gjitha vendet vakante përbëhet nga një numër prej afro 50 persona.
Kjo listë duhet të kalojë nëpërmjet procesit të vetingut i cili do të marrë kohën e saj disa mujore. Kështu edhe viti 2019 do ta gjejë vendin pa gjykatë Kushtetuese. Nëse procesi nuk shkon me hapat e duhur atëherë edhe viti 2020 rrezikon të përsërisë të njëjtën situatë.
Nëse vendi duhet ose jo të vazhdojë për një kohë të gjatë pa Gjykatë Kushtetuese, është një çështje që ekspertët shqiptar dhe të huaj të mirë paguar të reformës në drejtësi duhet ti japin përgjigje.
