Nga Boldnews.al
Kryeprokurorja e Përkohshme, Arta Marku, e kaloi sitën e Vetingut, pavarësisht se Komisioni i Rivlerësimit dhe vëzhguesi ndërkombëtar konstatuan se ajo kishte probleme të theksuara me përmbushjen e kriterit profesional.
Komisioni i Pavarur i Kualifikimit deklaroi paraditen e së Mërkurës se Arta Markut i jepet mundësia të vijojë funksionin e saj si prokurore dhe, rrjedhimisht, edhe si Prokurore e Përgjithshme e Përkohshme.
Do të jetë disi e vështirë për stafin nën varësinë e saj të jetë nën pushtetin e Kryeprokurores së Përkohshme, për të cilën ka dyshime mbi aftësitë e saj profesionale, të deklaruara publikisht nga Komisioni i Pavarur i Kualifikimit. Gjithësesi, emri i saj mund t’i shërbejë politikës në këtë situatë aspak të qetë, pas dështimit të qeverisë së Edi Ramës për hapjen e negociatave me Bashkimin Europian.
Pasi Këshilli Europian vendosi të mos përfshinte Shqipërinë në axhendën e samitit të tij, në fund të qershorit, në politikën shqiptare kanë nisur lëvizje të forta. Përfaqësues të maxhorancës, mbështetur edhe nga ambasadorja në ikje e Bashkimit Europian, Romana Vlahutin, po artikulojnë idenë e një kompromisi të madh politik, një bashkëqeverisje deri në qershorin e vitit 2019, kohë kur Këshilli Europian do të shqyrtojë rastin e Shqipërisë.
Si një ndër ofertat e kompromisit që mund të afrojë Edi Rama, sipas mediave pranë tij, është shkarkimi nga detyra i Kryeprokurores së Përkohshme, Arta Marku, e cila është e shumë-anatemuar nga ana e opozitës. Por kjo kartë e Edi Ramës për kompromis mund t’i ikte nga duart, për shkak të problemeve me aftësinë profesionale që konstatoi Komsioni i Vetingut për Kryeprokuroren e Përkohshme.
Në rast se Komisioni i Vetingut do të konkludonte se Arta Marku nuk do të përmbushte kriterin e aftësisë profesionale, atëherë do të urdhërohej, sipas ligjit, që ajo të zhvillonte një vit stazh në Shkollën e Magjistraturës. Pra, automatikisht, ajo do të ikte nga posti i Kryeprokurores së Përkohshme, duke i hequr në këtë mënyrë Edi Ramës një prej kartave që ai mund të përdorë për kompromis.
Në këtë situatë të ndërlikuar politike përfshihet në lojë edhe Komisioni i Vetingut. Në seancën dëgjimore të zhvilluar për Arta Markun kryesuesja e trupës gjykuese, Genta Bungo dhe vëzhguesi i Operacionit Ndërkombëtar të Monitorimit (ONM), Theo Jacobs, vendosën pikëpyetje të mëdha mbi aftësitë e Kryeprokurores për të mbajtur detyrën e saj.
“Arta Marku nuk është një prokurore fillestare, por një prokurore me eksperiencë. Unë vetë si prokuror di ta bëj diferencën midis dikujt që shkel ligjin dhe një krimineli”, u shpreh vëzhguesi ndërkombëtar, duke vënë në pikëpyetje aftësitë e Arta Markut, gjatë diskutimit për një rast konkret që kishte pasur nën hetim Kryeprokurorja e Përkohshme kur ushtronte detyrën në Shkodër.
Por, pavarësisht kritikave në adresë të Kryeprokurores së Përkohshme gjatë seancës dëgjimore, të zhvilluar në mungesë të saj, Komisioni i Vetingut deklaroi të mërkurën se “Arta Marku ka kaluar me sukses në tre shtyllat e rivlerësimit”, ku përfshihen pasuria, integriteti moral dhe aftësia profesionale.
Në mënyrë, Komisioni i Vetingut, i vjen në ndihmë edhe Edi Ramës, i cili do të vijojë të prezantojë Arta Markun si kartë kompromisi. Nëse Komisioni i Vetingut do të vendoste largimin e Kryeprokures nga posti i saj, kryeministri dhe kryetari i maxhorancës do të kishin një faktor më pak për t’i ofruar Lulëzim Bashës. Gjithnjë, nëse ky i fundit vendos për të bërë kompromis me Edi Ramën. Pasi gjasat janë që kompromis me kryeministrin nuk ka.
