Federata e Futbollit të Danimarkës ka reaguar, duke dënuar me forcë kërcënimet me vdekje ndaj sulmuesit Nikolai Jorgensen, i cili është vënë në shënjestrën e tifozëve në rrjetet sociale, pas eliminimit në ndeshjen me Kroacinë.
“Ndaluni! – shkruhet në qëndrimin e Federatës së Danimarkës në Twitter. – “Shoqëria jonë nuk i pranon kërcënimet me vdekje ndaj yjeve të futbollit, politikanëve dhe ndaj çdo personi tjetër. Është absolutisht e papranueshme. Do t’i drejtohemi policisë për t’i dhënë fund kësaj çmendurie”.
Gjithçka ndodhi pas ndeshjes me Kroacinë. Jorgensen humbi penalltinë vendimtare në eliminimin e Danimarkës, duke sjellë reagimin e tifozëve. Një zemërim që në fakt i ka kapërcyer kufijtë, duke shkuar deri te kërcënimet me vdekje. Tani fjalën e kanë organet kompetente të policisë.
Disa ditë më parë pati kërcënime edhe për lojtarin Xhimi Durmaz të Suedisë për një arsye edhe më banale: ai shkaktoi faullin në rastin e golit të Toni Kroos në ndeshjen me Gjermaninë.
