Uruguai ishte ekipi i dytë që u kualifikua në çerekfinale të Botërorit, pasi mposhti me rezultatin 2-1 Portugalinë në stadiumin “Fisht Olympic”. Të besuarit e Tabarez zhvilluan një ndeshje mjaft të mirë në Sochi, ku protagonisti absolut ishte sulmues Edinson Cavani, i cili realizoi një dopietë. Ronaldo ishte në hije në këtë takim me uruguaianët që e markuan mjaft mirë duke mos i lënë asnjë hapësirë. Në çerekfinale Uruguai do të përballet me Francën, që mposhti Argjentinën me rezultatin 4-3.
Ndërkohë që te Uruguai golat u shënuan nga Edinson Cavani, ku goli i parë ishte me kokë, për Portugalinë shënoi mbrojtësi, Pepe, gjithashtu në të njëjtën mënyrë. Pikërisht tek golat e shënuar apo më mirë të themi tek mënyra sesi janë realizuar këto gola, ka ndodhur një gjë e çuditshme, që ka shkaktuar habi tek të gjithë tifozët. Një tifoz që ka preferuar të mbetet anonim, ka publikuar skedinën para ndeshjes, ku shihet se ai kishte vënë bast se dy lojtarët e lartpërmendur do të shënonin pikërisht me kokë. Basti i vënë kapte shifrën 20 paund, ku në fund doli fitues duke fituar 10 mijë paund. Një skedinë që do të ishte normale, po të mos ishte për mënyrën si është luajtur.
