Festimi me shqiponjë i Granit Xhakës dhe Xherdan Shaqirit në fitoren e Zvicrës ndaj Serbisë ka ndezur një debat të madh ku shumë persona publikë dhe politikanë kanë komentuar gjestin e shqiptarëve.
Tani edhe “babai” i partisë zvicerane SVP, Christoph Blocher është futur në debat. Në episodin e fundit të “Teleblocher”, ish-këshilltari federal zviceran ka mbrojtur lojtarët e përfaqësueses zvicerane ku shprehet se Xhaka e Shaqiri u goditën nga provokimet e lojtarëve të Serbisë.
“Futbollistët nuk janë shenjtorë. Serbët në atë ndeshje nuk ishin shumë miqësorë. Vetëm se janë të natyralizuar, ata nuk janë zviceranë. Xhaka dhe Shaqiri u goditën në shpirt nga provokimet e serbëve, sepse ata janë gjithashtu shqiptarë”, tha politikani zviceran.
“Festimi i tyre nuk duhet marrë shumë seriozisht. Shqiponja me dy koka tani është një ‘dukuri’ e zakonshme,” tha Blocher, i cili në një moment edhe vetë e bën shqiponjën, duke ilustruar me gjeste atë që u pa në fushën e futbollit.
