Deputeti socialist Spartak Braho përfundoi në spital mëngjesin e sotëm si pasojë e një parainfarkti. Deputeti një ditë më parë ka pasur dhimbje gjoksi, shtrëngim dhe probleme me frymëmarrjen.
Pas vizitës së parë të bërë nga mjekët e Durrësit, ai është dërguar në Tiranë, në një spital privat, ku i është nënshtruar vizitës nga mjekët kardiologë. Ata konstatuan se Braho kishte pësuar parainfarkt dhe kanë thënë se ishte fat që u kap shpejt kjo gjendje.
Mësohet se kur ai ka shprehur shqetësime lidhur me gjendjen, familjarët dhe të afërmit i kanë thënë të nisej për kontroll mjekësor menjëherë.
Por duket se ai e ka neglizhuar, duke besuar se ishte nje gjë që kalonte vetë. Ka qenë ky insistim i të afërmve që parainfarkti u kap në kohë. Megjithatë, gjendja e tij shëndetësore është në kontrollin e mjekëve dhe nuk ka rrezik për jetën.
