Shumë pak njerëz e kishin menduar që skuadra kampione e botës në fuqi nuk do të arrinte të kualifikohej për në 1\8-at. Në Grupin F gjermanët ishin dukshëm skuadra favorite, pa filluar turneu. Por, surpriza nisi që në ndeshjen parë ndaj Meksikës, kur skuadra e Lëvit humbi edhe me rezultat, edhe me lojë. Dje trajneri aktivizoj 11 lojtarë plus rezervat për të mbajtur gjallë shpresat për një kualifikim në fazën tjetër. Por, kush janë 11 lojtarët që lanë në baltë skuadrën e përfaqësueses?
MANUEL NOJER
Numri një i portës gjermane u tregua i pasigurt në minutën e 18-të kur pas një gjuajtjeje të koreanëve nga goditja e dënimit, nuk arriti të zotëronte mirë topin që i shpëtoi nga duart. Në fakt, Manuel ka treguar që nuk ka qenë shumë i përfshirë në golat e pësuar. Në golin e dytë, Nojer u pa shumë konfuz, kur la portën për një goditje këndi dhe nuk u kthye më. Koreanët përfituan nga situata dhe shënuan golin e dytë, duke shuar përfundimisht shpresat e “Pancerave”. Ndoshta, Lëv duhet t’i kishte besuar më shumë minuta Ter Shtegen që u harrua në stol.
ZHOSHUA KIMISH
Nuk ishte ai që kemi parë te Bajerni, edhe pse në ndeshjen e djeshme ishte më mirë në fazën mbrojtëse se në ndeshjet e kaluara. Kimish dështoi gjithsesi në fazën sulmuese. Në pjesën e parë krosimet ishin të vakëta dhe të pasakta.
