Barazimi i vonuar kundër Marokut mund të jetë më i rëndësishmi deri më tani për Spanjën dhe do të thotë që tani Iago Aspas ka arritur të shënojë gjashtë gola me kombëtaren, duke e arritur këtë shifër më shpejt se çdo sulmues i La Roja”. Që nga debutimi i tij në “Wembley” në një miqësore kundër Anglisë, sulmuesi i Celta Vigo ka arritur në 12 ndeshje të shënojë 6 gola në vetëm 382 minuta. Roberto Soldado ndjek me 403 minuta, ndërsa sulmuesit si Alvaro Morata (662), Diego Costa (1,137), Fernando Torres (1,175) dhe Raul (1,512), kishin nevojë për shumë më tepër kohë për të arritur këtë numër. Trajneri i Spanjës është i vetëdijshëm se 30-vjeçari është çelësi që mund të ndihmojë sulmin e ekipit në momente të vështira.
Goli në sekondat e fundit të ndeshjes kundër Marokut, do të mbahet mend gjatë nga ylli spanjoll, pasi jo vetëm i dha një pikë me vlera kualifikimi Spanjës, por mënyra e ekzekutimit ishte brilante. “La Roja” u kualifikua si kokë grupi, teksa grumbulloi në total pesë pikë në tre ndeshje. Kundërshtari i radhës për spanjollët do të jetë Rusia, vendi organizator. Sigurisht në letër është një ndeshje e lehtë dhe Spanja duket e favorizuar për të kaluar më tej, por ky Botëror ka treguar se nuk ka ndeshje të lehta dhe kundërshtarë të dobët. Të besuarit e Fernando Hierro e dinë mjaft mirë këtë gjë dhe për më tepër ndeshja me Marokun nuk është harruar akoma, ku vetëm falë golit Iago Aspas siguruan kualifikimin për në turin tjetër të Kampionatit Botëror.
