Faza e parë, ajo e grupeve në Kampionatin Botëror “Rusi 2018”, po përfundon. Tashmë janë duke u luajtur sfidat e rëndësishme, ato që do të vendosin se kush do të kalojë në fazën tjetër, apo kush do të largohet nga Rusia. Ndeshje me tension të lartë, sepse akoma nuk është vendosur dhe mund të kemi surpriza në 90 minutat e fundit. Topi është i rrumbullakët dhe verdiktet jepen vetëm pas 90 minutave lojë. Është pikërisht topi i shkelmuar nga 32 ekipet e kualifikuara në këtë Botëror, ai që eliminohet i pari, duke mos arritur të mbërrijë në 1/8, sepse FIFA ka vendosur që duke nisur nga sfidat me eliminim direkt dhe deri në gjysmëfinale do të përdoret një tjetër version.
Topi i ri do të quhet “Telstar Mechta18” me një karakteristikë ngjyrë të kuqe në dizenjim, frymëzuar nga vendi organizator. “Macheta” në rusisht do të thotë “ëndërr” ose “ambicie” dhe është një frymëzim i mirë për 16 kombëtaret që do të tentojnë të vijojnë rrugëtimin drejt Moskës. Ky top do të përdoret deri në gjysmëfinale. Sikurse ndodh përgjithësisht, edhe në këtë rast nuk munguan polemikat përreth sferës së përdorur në këtë fazë të parë. Madje, nuk do të mungojnë as për fazën finale. Deri aty sa edhe portierët e kanë “ngelur në klasë” topin Telstar, duke e etiketuar si një top të çrregullt dhe që mashtronte në trajektore, sidomos në fazën finalizuese të goditjes.
Organizatorët zhvilluan hetimet e tyre dhe topi Telstar doli pa probleme. Nuk ka anomali evidente për tu shënuar, gabimet kanë ardhur vendosjet e çrregullta të futbollistëve, jo aq për faj të topit të “çmendur”. Ndonëse, për të parandaluar problematika të veçanta, shumë portierë kanë marrë masa aq sa kanë mundur. Një nga firmat prodhuese të dorezave të portierëve krijoi një model të vjetër, e gjitha e zezë, pa tegel qepje, pa ngjitëse dhe shumë më të buta nga modelet e mëparshme tradicionale, për të rritur kapjen dhe ndjeshmërinë ndaj topit. Ky lloj dorezash është po përdoret aktualisht nga dy portierët më të ndjekur të Botërorit, De Gea i Spanjës dhe Alisson i Brazilit.
