Trajneri i Zvicrës Vladimir Petkovic dëshiron ta harrojë sa më parë rrëmujën e shkaktuar në takimin me Serbinë. FIFA dënoi Xherdan Shaqirin dhe Granit Xhakën me nga 10 mijë franga zvicerane, kurse kapitenin Stephan Lichtsteinerin me 5 mijë, pasi ata bënë me dy duar shqiponjën, simbolin e shqiptarëve.
“Ne duhet të jemi të kujdesshëm dhe të mësojmë nga gabimet. Tai jemi të përqendruar te takimi i radhës”, deklaroi Petkovic në konferencë për media para sfidës kundër Kosta Rikës.
Helvetikët janë vetëm një hap larg kualifikimi për në fazën pasardhëse. Edhe mesfushori i kuqezinjve Valon Behrami foli në lidhje me këtë ngjarje.
“Problemi është i komplikuar e shkon thellë e më thellë. Na duhet më shumë kohë për ta diskutuar në tërësi. Ne jemi të lumtur që asnjëri nga ne nuk u pezullua.
Nuk do të festojmë më ashtu në takimet e radhës, pasi ndeshja e radhës nuk është aq speciale sikurse ajo e para. “Ndoshta ata do të festojnë me këtë gjë me klubet e tyre. Por nuk do të ndodh më në Botëror”, deklaroi mesfushori me origjinë kosovare.
FIFA argumentoi se për shkak të shkeljeve të nenit 57 të kodit disiplinor të FIFA-s, dhe sjelljeve josportive në kundërshtim me fair-play gjatë festimit të golave në sfidën Zvicër – Serbi, lojtari Granit Xhaka dënohet me 10 mijë franga zvicerane, Xherdan Shaqiri dënohet me 10 mijë franga zvicerane kurse kapiteni Stephan Lichsteiner me 5 mijë CHF.
Federata serbe e futbollit u dënua me 54 mijë franga zvicerane dhe iu tërhoq vërejtja për shkak të shfaqjes së flamujve me mesazhe diskriminuese dhe hedhjes së objekteve në fushë të tifozëve serbë.
Kurse presidenti i federatës serbe, Slavisa Kokeza dhe trajneri Mladen Krstajic për shkak të shkeljes së kodit disiplinor, u dënuan me nga 5 mijë franga.
