Në ndeshjen e parë në Grupin B, Cristiano Ronaldo ekezkutoi me mjeshtëri 11-metërshin e fituar ndaj Spanjës, ku edhe shënoi dy gola të tjerë më pas. Kapiteni 33-vjeçar realizoi në total tre gola ndaj “La Roja” dhe një ndaj Marokut, ndërkohë që mbrëmjen e djeshme u ndal përballë portierit Aliriza Beiranvand të Iranit. Pesë herë triumfuesi i “Topit të Artë” kishte mundësinë që të barzonte sulmuesin dhe kapitenin e Anglisë, Harry Kane, i cili aktualisht kryeson si golashënuesi më i mirë me pesë gola të realizuar deri më tani në Botërorin “Rusi 2018”.
Penalltia e pritur nga gardiani 25-vjeçar bëri jehonë në mediat sociale, pasi ia doli të ndalë një lojtar të jashtëzakonshëm si Cristiano Ronaldo, i cili arriti t’a dërgojë kombëtaren e tij edhe në raundin tjetër me ndihmën e Quaresmas gjithashtu. Ky i fundit realizoi një gol të jashtëzakonshëm mbrëmjen e djeshme në barazimin 1-1 ndaj Iranit. Barazim që i pozicionon në vend të dytë, dhe pse me pikë të barabarta me Spanjën ( kryeson me golavarazh).
Alirizai ka një histori rrëqethëse, ashtu siç shkruajnë mediat e huaja, ai ka fjetur si endacak rrugëve, ka punuar si lavazhier, në piceri para se fati t’i buzëqeshte e të arrinte aty ku është sot. Ai aktivizohet me ekipin Persepolis që aderon në kampionatin iranin.
Që nga viti 2016-të ai është pjesë e ekipit tehranas, ku ka zhvilluar 51 ndeshje në total. Ndërkohë që nga 2015-ta e deri më sot mbron ngjyrat e kombëtares iraniane, me të cilën ka luajtur 25 ndeshje. Paraqitja e tij pozitive në këtë Botëror, sidomos ndaj Portugalisë, ku i priti 11-metërshin Ronaldos do të jetë një nga momentet më të vlerësuara dhe veçanta në karrierën e tij.
