Pavarësisht se një njeri humbi jetën sot, ndoshta edhe për shkak të neglizhencës së bluzave të bardha, Ministria e Shëndetësisë ka një reagim teknik për rastin në Korçë.
Ajo thotë se ndryshe nga pretendimet e familjarëve se ambulanca shkoi me 40 minuta vonesë, ambulanca ka shkuar për 13 minuta, duke ofruar edhe një kopje elektronike të praktikës së gjurmimit me sistemin GPS të instaluar brenda autoambulancës.
Ministria e Shëndetësisë nuk sqaron nëse 60-vjeçarit i është dhënë ndihma apo jo edhe pas 13 minutave.
“Siç edhe mund të verifikohet fare lehtësisht nga dokumentacioni i shërbimit të urgjencës dhe regjistrimi elektronik i aktivitetit të lëvizjes në terren të autoambulancës “KO 4291 B Urgjenca Korçë”, thirrja nga Policia e Korçës për t’i ardhur në ndihmë personit në nevojë është marrë nga centrali i shërbimit të urgjencës mjekësore në orën 12:50 dhe orari i mbërritjes së autoambulancës te vendndodhja e personit në nevojë shënon kohën 13:03. Pra, siç mund të shihet qartësisht, autoambulancës i janë dashur 13 minuta, dhe jo 45 minuta apo më tepër, siç pretendohet në shkrimin e sipërpërmendur, për të mbërritur në vendndodhjen e personit në nevojë pas marrjes së thirrjes. Bashkëlidhur keni kopje elektronike të praktikës së gjurmimit me sistemin GPS të instaluar brenda autoambulancës për rastin në fjalë”, deklaron MSH.
