Ditën e sotme në Durrës është zhvilluar një superoperacion, ku u sekuestruan 4-5 milionë euro në 2 makina ‘Toyota Yaris’. Deri tani janë identifikuar 4 persona të përfshirë, ndërsa dy janë arrestuar, njëri prej tyre është shoferi i kamionit që solli makinat ku u gjetën eurot.
Edi Lika nga Durrësi është shoferi i kamionit me targë AA 120SP-AFR 559 dhe pronari i kompanisë së transportit të automjeteve. Publikohet edhe dëshmia e parë e Likës, që ka thënë se nuk ka dijeni për shumën rekord që ndodhej në makinat që po transportonte, ndërsa ishte kontraktuar për transportin nga një biznesmen nga Kosova.
“Nuk kam asnjë lidhje dhe dijeni për paratë, kam kryer thjeshtë transportin. Ishim kontraktuar nga një biznesmen nga Kosova kundrejt pagesës për të bërë transportin”, ka thënë pronari i kamionit.
Ndërsa ende mbetet mister se cili ka qenë biznesmeni nga Kosova që ka porositur 9 makinat, 7 prej të cilave ‘Toyota Yaris’. Policia po vijon hetimet për të zbuluar biznesmenin. Ndërkohë që makinat dhe shuma e eurove janë sekuestruar nga prokuroria për llogari të hetimeve. Operacioni është realizuar nga autoritetet shqiptare në bashkëpunim me palën italiane.
(“Toyota Yaris” ku u gjetën eurot e fshehura)
(Kamioni me automjetet që erdhën nga Belgjika)
Si u kap në Portin e Durrësit shuma marramendëse e eurove
Sipas burimeve nga policia eurot u gjetën të fshehura në dy makina tip “Toyota Yaris” pa targa, të ngarkuara në një trajler së bashku me makina të tjera të nisura nga Belgjika.
Ka dyshime se shuma e parave mund të jetë siguruar nga aktivitete kriminale. Ato kanë mbërritur në portin e Durrësit të fshehura në makinat e nisura nga Belgjika përmes linjës së trageteve Ancona-Bari, të ngarkuara në trajlerin me targa “AA 120 SP”, në pronësi të shtetasit Edi Lika, i cili disponon firmën “Klevi-888” e transportit të automjeteve. Ai është shoqëruar në polici ku ka deklaruar se nuk ka dijeni për shumën e parave të gjetura, por ka treguar emrin e biznesmenit që ka porositur ngarkesën me makina.
Fillimisht u tha se shuma e eurove ishte rreth 1.5 milion, ndërsa raportohet të ketë shkuar 4 deri në 5 milion euro.
Duket se për këtë operacion të policisë ka patur dijeni tre ditë më parë kreu i PD-së Lulzim Basha. Gjatë fjalës së tij në parlament, Basha iu drejtua deputetëve socialistë duke ihënë se një prej tyre ka porositur nga Gjermania një makinë “Toyota Yaris” por që është kapur së bashku me 1.5 milion euro brenda. Kjo deklaratë e Bashës ka bërë që kreu i PD-së të akuzohet për dekonspirim, kjo pasi blerësi i makinave nuk u paraqit të merrte ngarkesën.
Operacioni është zhvilluar nga policia shqiptare në bashkëpunim me Interpolin në Ancona. Katër persona janë identifikuar deri tani nga hetimet; Shoferi i trajlerit të ngarkuar me 9 makina dhe pronari i firmës së transportit të cilët dyshohet se nuk kishin dijeni për sasinë e eurove. Ndërsa nuk bëhet i ditur emri i porositësit të makinave por po punohet për identifikimin e tij. Dyshohet se ai është një biznesmen nga Kosova.
