Botërori “Rusi 2018” duhet të ishte skena ku do të shkëlqenin katër futbollistë të jashtëzakonshëm, protagonistë absolutë gjatë sezonit me klubet e tyre. Të përhershmit Ronaldo, Messi, Neymar dhe i katërti, ai që i mahniti të gjithë, Mohamed Salah. Perspektiva të ndryshme, ambicie dhe me një synim të vetëm, të dhurojnë spektakël, por deri më tani këto pritshmëri janë zbatur vetëm për gjysmën prej tyre, sepse Salah dhe Egjipti i tij po bëjnë gati valixhet për t’u kthyer në shtëpi, ndërsa për Messin frika që t’i ndodhë e njëjta gjë është e madhe.
Messi kundër botës, që i ka sytë nga ai, madje edhe duke e kritikuar për formën e treguar. Jashtëtokësori e sheh veten në vështirësi. Problem taktik, i grupit të skuadrës dhe mbi të gjitha ka mbi vete presionin që i rivali i tij, Crisitano Roanldo, ka arritur kuotën e katër golave në vetëm dy ndeshje.
Sigurisht që aftësitë e tyre askush nuk ka guximin t’i vërë në diskutim, pavarësisht se “yllit” të Barcelonës me kombëtaren i mungon shkëlqimi. Ndaj Islandës nuk mundi dot të finalzionte nga pika e bardhë e penalltisë.
Neymar, ndërkohë, nuk shihet të jetë në formë, madje shpesh i kritikuar për faktin se më shumë mendon për pamjen e tij, duke harruar që është një futbollist dhe jo një “pop-star”, si dhe për simulimet e panumërta.
Ai që po shijon magjinë e Botërorit është Cristiano Ronaldo. “Ylli” i madrilenëve po përjeton një sezon të jashtëzakonshëm. Në moshën 33-vjeçare rendimenti i tij është përtej parashikimeve.
Këta janë personazhet që kanë patur edhe më shumë vëmendje mediatike gjatë sezonit, por, sigurisht, në këtë botëror ka edhe “yje” të tjerë si Harry Kane, Romelu Lukaku apo Diego Costa, të cilët në ndeshjet e para kanë lënë gjurmët e tyre.
