Zviceranët e kanë fituar takimin e sotëm ndaj Serbisë me shifrat 2-1, falë golave të realizuar nga ana e Xhakës dhe Shaqirit.
Të dy futbollistët shqiptarë kanë zgjedhur të njëjtën mënyrë për të festuar golat e realizuar, duke bërë me duar shqiponjën. Ndërkohë këtu duhet theksuar se në nëntor të vitit 2014, vetë futbollistët shqiptarë që përfaqësojnë Zvicrën, kanë vendosur që të heqin shqiponjën si pjesë të festimit të tyre.
Kjo për të vetmen arsye pasi një festë e tillë i kishte hapur shpeshherë probleme këtyre futbollistëve duke i kthyer në qendër të polemikave në Zvicër, pasi ndjenja e përkatësisë shqiptare nuk mund të pranohej lehtësisht nga tifozët zviceranë. Por kur bëhet fjalë për një takim në Botëror kundër Serbisë, Xhaka dhe Shaqiri nuk mundën t’i përmbaheshin rregullave të vendosur nga vetë ata.
