Argjentina dhe Kroacia e kanë nisur me vrull ndeshjen e dytë në grupin D. Amerikano-jugorët kanë dominuar për sa i përket statistikave, me një mbajtje topi që kalon 65% në pjesën më të madhe të kohës, por ishte Kroacia që pati rastin më të mirë që në minutën e pestë të takimit.
Ivan Perisic depërtoi bukur në të majtë dhe gjuajti në kuadrat por portieri Caballero arriti ta largonte jashtë, duke shpëtuar skuadrën nga një gol i sigurt.
Skema 3-4-3 duket se i ka dhënë mundësi Argjentinës të mbajë më shumë zotërimin e topit, por pak herë ka arritur t’i afrohet rrezikshëm portës kroate. Në të 25, Aguero pati një mundësi të mirë pasi kombinoi bukur me Mezan në të majtë, por krosimi i tij në zonë u largua në goditje këndi.
Megjithatë, ylli i skuadrës Leo Messi nuk po arrin të dalë në lojën e tij, kjo edhe falë markimit të rreptë që po i bëhet. Nga ana tjetër, Luka Modric, në një rol pak më kreativ sonte, po arrin të mbajë skuadrën lart duke i dhënë besim shokëve falë saktësisë së tij me topin.
Enzo Perez humbet një rast të artë në minutën e 30, kur me portën e boshatisur falë një gabimi të kroatëve dërgon topin jashtë.
