Pas trazirës që shkaktoi me thirrje elektorale dhe parulla pro shembjes së Teatrit Kombëtar, kryebashkiaku Erion Veliaj është nxjerrë nga komisioni i Informimit. Pas tij, ka ikur edhe Ministrja e Kulturës Mirela Kumbaro dhe deputetët e PS, që e kanë bojkotuar njëzëri mbledhjen dhe kanë dëshmuar se lëvizja e tyre politikisht ishte e parapërgatitur.
Kryetarja e Komisionit , deputetja e PD Albana Vokshi u ka bërë thirrje të mos braktisin detyrën, sepse ndaj Veliatj u zbatua vetëm rregullorja e parlamentit dhe asgjë tjetër; po ashtu, Vokshi theksoi se dukej qartë se i gjithë tensioni që u krijua ishte stisur me qëllim që mazhoranca të mos përballej me krimin që po kryente, shembjen e godinës së Teatrit Kombëtar dhe ngritjen e kullave shumëkatëshe në vendin e saj.
Vokshi tha:
“Ju duhet ta kuptoni se gjithçka ishte e stisur! Ai erdhi për të bërë arrogantin. Meqë paguhet nga oligarkët dhe bosët e drogës ai mendon se këtu mund të bëjë arrogantin. Meqë ishte i paftuar, kërkoi të shkatëronte mbledhjen.
Gjithçka ishte e qëllimshme sepse qeveria nuk do të përballet me këtë krim kulturor historik, me këtë korrupsion, me dhënin e tokës privatit sepse fitimet në këtë tokë janë marramendëse. Ne u kemi bërë thirrje të distancohen nga ky akt , por me sa duket nuk heqin dorë!”
