Të mërkurën, besimtarët në mbarë botën festojnë Kurban Bajramin, ditën e sakrificës, bindjes ndaj Zotit, solidaritetit dhe dashurisë për njëri-tjetrin. Kreu i Komunitetit Mysliman, Bujar Spahiu, uroi shqiptarët për këtë festë, një ndër më të rëndësishmet e besimit islam, dhe tha se këto, më shumë se kurrë, janë kohë reflektimi.
“Në prag të festës së madhe të Kurban Bajramit, kam kënaqësinë dhe nderin që, në emrin tim personal dhe në emër të Komuniteti Mysliman i Shqipërisë, t’ju përcjell urimet më të përzemërta për paqe, mirësi, begati dhe harmoni në familjet tuaja”, tha ai në mesazhin pir besimtarët.
“Kurban Bajrami është një ndër festat më të rëndësishme të besimit islam. Është festa e sakrificës, e bindjes ndaj Zotit, e solidaritetit dhe e dashurisë për njeriun. Ajo na rikujton shembullin e profetit Ibrahim (a.s.), i cili me devotshmëri të plotë tregoi besim, durim dhe përkushtim ndaj Krijuesit. Ky mesazh mbetet edhe sot një thirrje e fuqishme për të forcuar moralin, përgjegjësinë dhe humanizmin në jetën tonë të përditshme”.
“Në këto ditë të bekuara, mijëra besimtarë nga mbarë bota ndodhen në tokat e shenjta të Mekës për të kryer Haxhin, një nga shtyllat themelore të Islamit. Haxhi është simbol i unitetit, barazisë dhe përkushtimit ndaj Zotit. Besimtarë të gjuhëve, kulturave dhe kombeve të ndryshme bashkohen në një adhurim të përbashkët, duke dëshmuar se feja jonë ndërtohet mbi paqen, respektin dhe vlerat njerëzore universale.
Kjo festë na fton të reflektojmë më shumë për njëri-tjetrin. Të jemi më pranë familjeve tona, më pranë të moshuarve, njerëzve në nevojë, jetimëve dhe çdo zemre që ka nevojë për mbështetje e shpresë. Kurbani nuk është vetëm një ritual fetar; ai është një akt solidariteti, ndarjeje dhe kujdesi për tjetrin.
Në një kohë kur bota përballet me sfida të shumta, konflikte, pasiguri dhe vështirësi sociale, mesazhi i Kurban Bajramit merr një rëndësi edhe më të madhe. Kemi nevojë më shumë se kurrë për mirëkuptim, dialog, respekt dhe bashkim mes njerëzve. Shoqëria jonë ka nevojë për më shumë dashuri, më shumë drejtësi dhe më shumë shpresë.
Shqipëria është një vend që krenarisht ka ruajtur harmoninë ndërfetare dhe respektin reciprok mes besimeve. Kjo është një vlerë e çmuar që duhet ta ruajmë dhe ta forcojmë çdo ditë. Festa të tilla na kujtojnë se besimi duhet të jetë gjithmonë një burim paqeje, qytetarie dhe shërbimi ndaj të mirës së përbashkët.
Në këtë ditë të shenjtë, lusim Zotin që të pranojë adhurimet, lutjet dhe kurbanet e besimtarëve, të sjellë paqe në zemrat tona, begati në familjet tona dhe mëshirë për mbarë njerëzimin.
Uroj që kjo festë të sjellë gëzim në çdo vatër shqiptare, shëndet për familjet tuaja dhe mirësi për gjithë shoqërinë tonë”.
