Eksperti i ekonomisë Neritan Sejamini, i ftuar në emisionin “Opinion” në Tv Klan foli për çmimin e naftës dhe cilësinë e karburanteve.
Sejamini u shpreh se çmimet e karburanteve në vend janë shumë të larta dhe nafta është e keqe.
Ai shtoi se edhe ushqimet janë me cilësi të ulët. Sejamini vlerësoi se kjo ndodh, sepse tregu ka monopole dhe oligopole.
Neritan Sejamini: Taksat në naftën shqiptare janë shumë të larta. Shqipëria e ka dy herë më të lartë taksën sesa vendi që e ka më lart taksën për karburantin. Ne jemi vendi i tretë më i varfër në Europë sot që po flasim. Produktet shqiptare janë skandaloze. Edhe në produkte të tjera, cilësinë e kemi të dobët. 80 përqind e të gjitha produkteve tona bëhen me qumësht pluhur ose qumësht të importuar nga jashtë.
Edhe pse kemi produkte me cilësi të dobëta, sërish çmimet janë shumë të larta. Gjëja e parë që e shkakton është monopoli. Cilësia e produkteve tona është e ulët, përpos se kemi çmim shumë të lartë. Nafta shqiptare është e dobët, edhe pse çmimi është shumë i lartë. Është bërë një test. Është marrë nafta në Shqipëri dhe në Greqi e në Malin e Zi, dhe në vendin tonë ka dalë shumë e keqe cilësia. Cilësia është problem për çdo produkt, jo veç tek nafta. Edhe vetë Rama e thotë se nuk futemi dot në BE, sepse cilësia e produkteve lë për të dëshiruar.
