Almir Daçi, luftaraku i ISIS, i cili u bë i njohur në një video ku kërcënonte në gjuhën shqipe se ditë të vështira do të vijnë për Shqipërinë. Vdekja e tij erdhi në frontin e luftës . Janë zbuluar fakte të reja pas vdekjes së tij. Agjencitë ligjzbatuese në Shqipëri, kanë mundur të vjelin informacione të rëndësishme për rrethanat e vrasjes, ku më kryesorja është ajo e përdorimit të pogradecarit për misione tepër të vështira.
Mendohet se ish-imami i Leshnicës është përdorur si “mish për top” nga shefat e ISIS, derisa gjeti vdekjen në frontet më të vështira të luftës. Kur kanë kaluar pak ditë nga mësimi i lajmit për vdekjen e Almir Dacit, tanimë po dalin në dritë edhe rrethanat e tërthorta të ngjarjes, teksa familjarët më kot presin ardhjen e trupit të pajetë të 33-vjeçarit.
Që në krye të herës, duket se Daci ishte tepër i sigurt që ishte ngritur në përgjegjësi dhe kishte fituar besimin në radhët e shefave të ISIS, porse gjithsesi nuk duhet të harronte se mbetej gjithnjë nën urdhrat e tyre, sepse komandimi dhe menaxhimi i Kalifatit është e drejtë ekskluzive e vendasve, pra sirianëve dhe irakianëve, shkruan gazeta Shqip.
Daci bënte pjesë tek të huajt, pra ishte mes armatës së xhihadistëve që kishin shkuar për të luftuar në tokat e Shamit (Siri dhe Irak). Kësisoj, besohet se Daci është dërguar me mision luftimi në frontet më të ashpra të luftimeve, ku ka gjetur vdekjen.
