Tre skiatorë kanë humbur jetën pasi u zunë poshtë nga një ortek dëbore në vendpushimin e njohur Val d’Isere, në Alpet franceze.
Sipas mediave të huaja, nga orteku ka mbetur i lënduar edhe një shtetas britanik. Viktimat ishin pjesë e një grupi prej gjashtë personash që po bënin ski jashtë pistave të kontrolluara, nën shoqërinë e një instruktori profesionist.
Të gjithë ishin të pajisur me mjete sigurie kundër ortekëve, përfshirë transmetues sinjali, lopata dhe sonda për kërkim në dëborë. Autoritetet lokale kanë nisur hetimet për të zbardhur rrethanat e ngjarjes.
Prokurori Bachelet bëri të ditur se testet e alkoolit dhe drogës ndaj instruktorit rezultuan negative. Ndërsa shefi i pistave, Cedric Bonnevie, deklaroi se një nga viktimat dyshohet se është bllokuar në pjesën e sipërme të shpatit, ndërsa dy të tjerët ndodheshin më poshtë dhe nuk patën mundësi të shmangnin ortekun.
Më herët, Meteo-France kishte lëshuar alarm të kuq për rrezik të lartë ortekësh në zonë. Vetëm pak ditë më parë, dy skiatorë të tjerë humbën jetën në një ortek në Alpet franceze, ndërsa një tjetër viktimë u raportua në Montgenevre.
