Pas 7 orësh që nga bllokimi i rrugës Librazhd – Qafë Thanë nga rrëshqitja e një masivi dheu, ka reaguar më në fund Ministria e Infrastrukturës dhe Energjisë .
Në një njoftim në rrjetet sociale MIE-ja shprehet se po punohet për zhbllokimin e rrugës dhe se rrëshqitja ka ardhur si shkak i erozionit dhe rreshjeve të mëdha të javëve të fundit.
MIE-ja, shton se në terren ndodhen 6 eskavatorë dhe 2 fadroma që po pastrojnë inertet e rëna në rrugë, teksa kërkon edhe mirëkuptimin e qytetarëve.
Shembja e gurëve dhe bllokimi i aksit Librazhd–Prrenjas, prej më shumë se 7 orësh ka lënë të izoluar dhe të bllokuar qindra qytetarë, përfshirë të mitur dhe të moshuar.
Rruga e bllokuar është pjesë e një projekti më të gjerë të zgjerimit dhe rehabilitimit të aksit Librazhd–Qafë Thanë, projekt që synon përmirësimin e lidhshmërisë dhe sigurisë së trafikut në këtë korridor strategjik.
Punimet e këtij projekti kryhen nga kompania A.N.K. SHPK, e cila ka historik në projekte infrastrukturore në Shqipëri dhe ka fituar tenderë publikë për faza të ndryshme të rrugës. Kompania ka lidhje me biznesmenin Ndue Kola, ndërsa pronësia aktuale është në duart e vëllait të tij, Agim Kola. Tenderi për fazën e fundit të zgjerimit të rrugës është shpallur me një fond limit prej rreth 29 milionë eurosh, përfshirë TVSH-në.
Ndëkohë sipas raportimeve, pikërisht kompania A.N.K konsiderohet shkaktare direkte e bllokimit, pasi thuhet se kjo e fundit po punon për ndërtimin e segmentit rrugor, pjesë e Korridorit Tetë, dhe ka nisur punimet për shembjen e pjesës së rrezikshme në zonën e njohur si Kthesat e Dragostunjës.
“ARRSH dhe kompania kontraktore e mirëmbatjes janë angazhuar me të gjitha mjetet dhe mundësitë për zhbllokuar aksin rrugor Elbasan – Qafë Thanë. Në segmentin Librazhd-Prrenjas, rreth 3 km larg Librazhdit, në fshatin Dragostunjë, si rezultat i rreshjeve të dendura është shkëputur një masiv dherash dhe shkëmbinjsh nga shpati i sipërm i hekurudhës duke bllokuar totalisht hekurudhën dhe rrugën poshtë saj.
Menjëherë kontraktorët janë angazhuar me 6 eskavatorë, 2 fadroma dhe punonjës për hapjen e rrugës sa më shpejt që të jetë e mundur. Arsyet e kësaj situate lidhen me rreshjet e dendura te javëve të fundit dhe erozionin e theksuar të shpatit mbi rrugë.
Paralelisht me pastrimin e materialit të rënë po bëhet edhe çmontimi i masivit që ka lëvizur dhe që është i paqëndrueshëm, duke shmangur një rrezik të mundshëm për rënie të mëtejshme. ARRSH kërkon mirëkuptimin e të gjithë përdorueseve të mjeteve për vonesat e shkaktuar nga kjo ndërhyrje e domosdoshme për zhbllokimin e rrugës”, thuhet në njoftimin e MIE-së.
