Ish-gjyqtari Alaudin Malaj, i ftuar në studion e Quo Vadis, të moderatores Pranvera Borakaj ka bërë një deklaratë të fortë.
Ai tha se një gjyqtare të Gjykatës së Apelit Tiranë, është parë duke shoqëruar me persona të botës së krimit.
“E di çfarë bën Gjykata e Apelit Tiranë? Kthen për rigjykim bashkimin e dënimeve pas 5 vjetësh. Një person është dënuar dhe tani, pas pesë vitesh, një gjyqtare shumë e famshme e kthen çështjen për rigjykim.
Flasim për të njëjtën gjyqtare që është parë duke dalë natën me persona të bandave, me kapelë clube”, deklaroi Malaj.
Ndërkohë në lidhje me ndryshimet e kodit penal, ai tha se sjell pasoja të rënda juridike për të dënuarin, i cili aktualisht ndodhet në burg me dy vendime të formës së prerë dhe pa qartësi ligjore mbi dënimin që duhet të vuajë.
“Një bashkim dënimesh pas pesë vitesh kthehet për rigjykim dhe njeriu sot rri në burg me dy vendime të formës së prerë dhe nuk di se çfarë burgu të bëjë”, tha Malaj.
