Presidenti i Ukrainës, Volodymyr Zelensky, ka deklaruar se nuk i beson presidentit rus Vladimir Putin dhe se, nëse do të zhvillohej një takim mes tyre, fokusi kryesor do të ishte agresioni rus dhe territoret e pushtuara.
Në një intervistë për Fox News, Zelensky u shpreh se një takim i tillë nuk do të ishte dëshirë personale, por një domosdoshmëri për të shmangur një përshkallëzim më të madh të konfliktit.
“Do të flisja për territoret dhe për arsyet pse Rusia e nisi këtë luftë. Ai na pushtoi. Nuk dua të flas me të, ai është armiku im, por është e rëndësishme të kuptojmë se nuk duhet të ketë një luftë të tretë”, tha presidenti ukrainas.
Zelensky theksoi se nuk i beson Putinit dhe shtoi se edhe kreu i Kremlinit nuk ka besim tek ai. Sipas tij, qëllimi i Rusisë ishte pushtimi i të gjithë territorit të Ukrainës.
“Mendoj se synimi i tij ishte të pushtonte të gjithë vendin. Dua të shoh dhe të dëgjoj që kjo nuk do të ndodhë më kurrë”, u shpreh Zelensky.
Duke folur për situatën në front, presidenti ukrainas deklaroi se për herë të parë forcat ruse kanë ndalur rritjen numerike. Sipas tij, gjatë viteve të fundit Rusia ka mobilizuar rreth 43 mijë persona në muaj, por këtë vit numri i të mobilizuarve është barazuar me humbjet në fushëbetejë.
“Kjo do të thotë se për herë të parë, ushtria e tyre nuk po rritet më”, theksoi ai.
Në këtë kontekst, Zelensky vlerësoi se viti 2026 mund të jetë vendimtar për përfundimin e luftës, nëse Moska nuk ndërmerr një valë të re mobilizimi.
