Kuzhina italiane është shpallur zyrtarisht trashëgimi kulturore jomateriale e njerëzimit nga UNESCO, duke u bërë kështu e para kuzhinë kombëtare që njihet për tërësinë e saj, dhe jo për një recetë apo traditë të vetme.
Njoftimi u bë të mërkurën gjatë Asamblesë së UNESCO-s në Nju Delhi, ku u vendos që gatimi italian – nga makaronat dhe mocarela, te vera dhe tiramisu – të përfshihet në listën prestigjioze të traditave që përfaqësojnë trashëgiminë kulturore jomateriale të njerëzimit.
Italia tashmë numëron 21 tradita të tjera të mbrojtura nga UNESCO, përfshirë artin e përgatitjes së picës napolitane dhe këndimin e operës, por kjo është hera e parë që një vend njihet për kulturën e tij të kuzhinës në tërësi.
