Këngëtarja me origjinë shqiptare, Eleni Foureira, e cila përfaqësoi Qipron në Festivalin Europian të këngës, u prit dhe u nderua nga presidenti i vendit. Këngëtarja tha se i është mirënjohëse këtij vendi që e besoi atë dhe ajo që bëri që e gjithë Europa të flasë për Qipron.
Është nderuar nga presidenti i Qipros, Nicos Anastasiades, për suksesin e arritur në ‘Eurovision 2018’. 31-vjeçarja ishte shumë pranë triumfit në edicionin e 63-të Festivalit Evropian të muzikës, por ajo arriti të dilte e dyta në këtë garë. Ky ishte pozicioni më i lartë për shtetin ishullor.
“Është nder i madh që u vlerësova nga presidenti. Ndjehem krenare që e përfaqësova Qipron në ‘Eurovision 2018’ me Fuego”, shkruan bukuroshja në Instagram.
Ndërsa në videon e postuar ajo falenderon Qipron dhe të gjithë njerëzit që besuan tek zëri i saj për t’i përfaqësuar në Eurosong. Këngëtarja thotë se ajo kishte vetëm një qëllim që Europa të fliste për Qipron dhe këtë ia arriti me shumë punë dhe kurajo. Ndërkohë presidenti Anastasiades e ka falenderuar Elenin për përfaqësimin dinjitoz në Eurovizion.
Këngëtarja me origjinë shqiptare jeton prej vitesh në Greqi dhe është një nga zërat më të vlerësuar dhe pëlqyer nga publiku. Kënga e saj Fuego është dhe më e dëgjuara në radiot greke dhe europiane.
