Nga Boldnews.al
Komisioni i Pavaruar i Kualifikimit (KPK), institucioni kryesor i procesit të vettingut po ecën me hapa të ngadaltë, duke mbajtur në kolaps të plotë sistemin e drejtësisë dhe zvarritjen e ngritjes së institucioneve të reja. Në dhjetë muaj, KPK ka marrë në shqyrtim dhe dalë me vendim, për vetëm nëntë kandidatë, gjyqtarë dhe prokurorë. Kjo shton akoma më shumë dyshimin se po zvarrit qëllimisht procesin, në mënyrë që institucionet e reja si Byroja Kombëtare e Hetimit, SPAK, KLGJ dhe KLP, të mos formohen në kohë, pasi i gjithë procesi mbetet në duarrt e 12 anëtarëve të vettingut.
KPK, edhe pse u pompua me shumë bujë, deri më tani ka marrë në analizë vetëm deklaratat publike të pasurisë së gjyqtarëve dhe prokurorëve, të siguruara nga ILDKPIK (Inspektoriati i Lartë i Deklarimit të Kontrollit të Pasurisë dhe Konfliktit të Interesit). Mbi bazën e të dhënave që kanë marrë nga ky institucion, KPK ka dalë në vendime, duke mbajtur në detyrë disa nga gjyqtarët e prokurorët dhe shkarkuar të tjerë që mund të kishin parregullsi në deklarimin e pasurisë. Pavarësisht se nuk kanë thuajse asnjë hetim të thelluar, edhe për verifikimin e deklaratave publike të dorëzuara në ILDKPIK po e zvarrisin procesin, i cili me ritme të tilla mund të kërkojë deri në tetë vite.
Dështimin e vet, sidomos në hetimin e thellur mbi aftësitë profesionale dhe integritetin e subjekteve të rivlerësisimit, KPK e “publikon” në një deklaratë zyrtare të janarit të këtij viti. “Në vitin 2017, në Komisionin e Pavarur të Kualifikimit janë depozituar 334 ankesa, ndërsa gjatë ditëve të para të vitit 2018 ka pasur 30 ankesa nga qytetarët. Komisioni i Pavarur i Kualifikimit konstaton se nuk janë depozituar nga qytetarët prova dhe fakte konkrete lidhur me subjektet që do të rivlerësohen në bazë të tri kritereve të parashikuara në ligjin nr.84/2016, por bëhet fjalë për ankesa ndaj vendimeve të cilësuara prej tyre si të padrejta nga ana e sistemit të drejtësisë”-thuhet në njoftim. Në këtë mënyrë ka rënë përfundimisht hetimi i thelluar mbi pasurinë e padeklaruar të gjyqtarëve dhe prokurorëve dhe vendimet e paligjshme që janë dhënë prej tyre ndër vite.
