Që nga hyrja në fuqi e armëpushimit më 10 tetor, të paktën dy fëmijë po vdesin çdo ditë në Rripin e Gazës, raporton UNICEF. Sipas agjencisë së OKB-së për fëmijët, që nga fillimi i armëpushimit 67 fëmijë janë vrarë dhe dhjetëra të tjerë janë plagosur.
“Dhjetëra të tjerë janë plagosur. Kjo është një mesatare prej pothuajse dy fëmijësh të vrarë çdo ditë që kur hyri në fuqi armëpushimi”, tha zëdhënësi i UNICEF-it, Ricardo Pires, në Gjenevë.
Ndërkohë, furnizimet me ushqim po hyjnë gradualisht në Gaza, por ato nuk përmbushin ende nevojat humanitare të mëdha. Shirat e dimrit kanë rrezikuar të shkatërrojnë disa nga furnizimet e mbetura, duke vështirësuar më tej jetën e familjeve.
Martin Penner, përfaqësues i Programit Botëror të Ushqimit (WFP), tha se “gjërat janë më mirë se para armëpushimit, por ende kemi një rrugë të gjatë për të bërë. Mbështetja e vazhdueshme është thelbësore për të ndihmuar familjet të rindërtojnë shëndetin, ushqyerjen dhe jetën e tyre”.
Qindra mijëra palestinezë vazhdojnë të varen nga ndihmat ushqimore. Që nga fillimi i armëpushimit, WFP ka dërguar rreth 40,000 ton ushqim në Gaza, duke arritur vetëm 30% të objektivit të saj për paketa ushqimore, për shkak të vështirësive logjistike dhe çmimeve të larta të ushqimeve, që mbeten jashtë kapacitetit të shumë familjeve.
