Analizë nga Johana Bhuiyan, The Guardian
Tregjet globale të aksioneve u rritën, pasi Nvidia publikoi rezultatet e tremujorit të tretë që tejkaluan parashikimet e Wall Street, duke qetësuar për momentin shqetësimet nëse vlerësimet e larta të kompanive të AI kishin arritur kulmin.
Të mërkurën, gjithë vëmendja ishte tek Nvidia, kompania amerikane e industrisë së AI dhe kompania me vlerën më të madhe në botë në bursë, me analistë dhe investitorë që shpresonin se fitimet e saj do të zbusnin frikën e krijimit të një flluske në sektor.
Jensen Huang, themelues dhe CEO i Nvidia-s, hapi thirrjen me investitorët duke u përpjekur të heqë këto shqetësime, duke thënë se po ndodhte një transformim i madh në AI dhe Nvidia ishte themelore për këtë transformim.
“Ka pasur shumë diskutime për një flluskë të AI”, tha Huang. “Nga këndvështrimi ynë, ne shohim diçka shumë të ndryshme. Nvidia është ndryshe nga çdo akselerator tjetër. Ne jemi të shkëlqyer në çdo fazë të AI, nga para-trajnimi deri te pas-trajnimi e te inferenca”. Kompania tejkaloi pritshmëritë e Wall Street pothuajse në çdo aspekt, siç ka bërë edhe në disa tremujorë të mëparshëm, një shenjë se brom-i gjigand financiar i AI nuk po ngadalësohet.
Nvidia raportoi 1.30 dollarë fitim për aksion mbi 57.01 miliardë dollarë të ardhura totale, duke mposhtur pritshmëritë e investitorëve prej 1.26 dollarësh për aksion dhe 54.9 miliardë dollarësh të ardhura.
Shitjet janë rritur 62% krahasuar me një vit më parë. Kompania raportoi 51.2 miliardë dollarë të ardhura nga qendrat e të dhënave, duke tejkaluar pritshmërinë prej 49 miliardësh. Për tremujorin e katërt, kompania pret rreth 65 miliardë dollarë të ardhura; analistët kishin parashikuar 61 miliardë.
Në thirrjen me investitorët, Huang tha se po ndodhnin tre ndryshime të mëdha: një kalim drejt AI-së gjenerative; dhe një kalim drejt AI-së agentike dhe fizike, për shembull robotë ose makina autonome.
“Kur të mendoni për investimet në infrastrukturë, merrni parasysh këto tre dinamika themelore”, tha ai. “Secila do të kontribuojë në pasurinë infrastrukturore. Nvidia mundëson të tre kalimet dhe e bën këtë për çdo formë ose modalitet të AI”.
Kërkesa për çipet e kompanisë vazhdon të rritet.
“AI po shkon kudo, duke bërë gjithçka, të gjitha njëkohësisht”. Thomas Monteiro, analist i lartë në Investing.com, tha se ka Nvidia ka prioritet rritjen e qendrës të të dhënave. “Kjo i përgjigjet shumë pyetjeve mbi gjendjen e revolucionit të AI, dhe verdikti është i thjeshtë: nuk është askund pranë kulmit të saj. Teksa investitorët shqetësohen se shpenzimet e mëdha mund të ngadalësojnë ciklet e adoptimit të AI, Nvidia vazhdon të tregojë se rritja e qendrave të të dhënave nuk është opsion, por nevoja kryesore e çdo biznesi teknologjik në botë”.
Analistët thanë se, edhe pse ishin të sigurt që Nvidia do tejkalonte pritshmëritë, ata prisnin me ankth thirrjen me investitorët për të kuptuar më shumë mbi kërkesën aktuale të industrisë për çipet e AI të kompanisë.
“Ende nuk ka dyshim se Nvidia është shumë përpara të tjerëve në çipet e fokusuara për AI”, shkroi David Meier, analist i Motley Fool. “Kështu që pres të ardhura, marzhe dhe flukse monetare afër parashikimeve. Por informacioni i vërtetë i vlefshëm do të vijë nga komentet e drejtuesve mbi atë se ku po shkojnë tregjet e tyre”.
Aksionet e Nvidia kanë rënë 7.9% në nëntor, pasi investitorë të mëdhenj shiten aksionet e tyre. Fondi i Peter Thiel, Thiel Macro, shiti të gjithë portofolin e tij në kompani tremujorin e fundit, me vlerë rreth 100 milionë dollarë. Edhe Softbank ka shitur 5.8 miliardë dollarë aksione, duke shtuar frikën për një flluskë të AI.
Aksionet e Nvidia, që muajin e kaluar u bë kompania e parë 5 trilionë dollarësh, u rritën mbi 5% në tregun pas-orar, ndërkohë që edhe kontratat e S+P 500 dhe Nasdaq u rritën. Edhe tregjet aziatike u rritën të enjten.
Megjithatë, Stephen Innes nga SPI Asset Management tha se është zbehur frika nga flluska e AI. “Parashikimi i fundit i Nvidia ka zbehur për momentin frikën më të madhe të flluskës së AI që kishte kapur tregjet globale. Por mos gaboni: ky është ende një treg që ecën mbi një tel mes euforisë së AI dhe realitetit të borxhit”.
“Unë nuk besoj se rritja e Nvidia është e qëndrueshme në afat të gjatë”, tha Alvin Nguyen i Forrester. “Kërkesa për AI është e paparë, por nëse ndodh një korrigjim i tregut kur furnizimi të përmbushë kërkesën ose ritmi i inovacionit të ngadalësohet, pres që rritja e vazhdueshme e vlerës së aksioneve të ngadalësohet.”
