Kur flitet për Shqipërinë në seancë plenarë të Parlamentit Europian, progresi i vendit sfidohet dukshëm nga problemet e mprehta në Shqipëri. Gjatë debatit mbi rezolutën e Knut Fleckenstein për integrimin europian të Shqipërisë, ka dalë qartëqisht në pah, se për Bashkimin Europian vendi nuk mund të pretendojë hapjen e negociatave të anëtarësimit pa finalizimin dhe fillimin e zbatimit të reformës në drejtësi.
Johannes Hahn, komisioner për fqinjësinë dhe negociatat e anëtarësimit: «Partitë politike tani duhet të angazhohen në një dialog konstruktiv vendimtar dhe të finalizojnë reformën e drejtësisë. Ky është një detyrim tejet i vonuar i politikës, i cili është në interes të të gjithë qytetarëve. Miratimi i reformës gjyqësore është një oportunitet i rëndësishëm për të gjithë vendin në tërësi dhe kjo reformë është shumë e çmuar për të qenë subjekt i ndonjë manovre politike partiake.
Monica Macovei, eurodeputete: « Në sistemin e drejtësisë ka ende probleme. Ne duam të shohim, se cilat janë ndryshimet kushtetuese që duhen të kryhen për reformën e gjyqësorit. Por ajo që është më e rëndësishme është zbatimi i ligjeve, si dhe që sistemi gjyqësor të pastrohet nga gjyqtarët dhe prokurorët e korruptuar”.
Knut Fleckenstein, eurodeputet ( S&D): “Finalizimi i reformës së gjyqësorit dhe fillimi i zbatimit të saj duhet të hapë rrugën për një rekomandim pozitiv të Komisionit Europian lidhur me negociatave të anëtarësimit të vendit në Bashkimin Europian dhe Parlamenti do japë mbështetjen e tij”.
Kriminalizimi i jetës politike dhe parregullsitë serioze të evidentuara nga OSBE/ODHIR në zgjedhjet lokale përbëjnë shqetësim serioz dhe kanë lënë impakt negativ për shtetet anëtare dhe institucionet e Bashkimit Europian. Kjo shpjegon pse zbatimi i ligjit të dekriminalizimit është artikuluar me të njëjtën forcë krahas zbatimit të reformës zgjedhore edhe gjatë debatit në Strasbourg.
Jeanine Hennis-Plasschaert, ministre e mbrojtjes së Holandës: “Ne e mirëpresim aprovimin e ligjit të dekriminalizimit, që duhet të rrisë besimin e qytetarëve te politikanët dhe institucionet publike.Ne tani presim hapa konkrete për zbatimin e këtij ligji.Përveç kësaj, Shqipëria përballet me sfida domethënëse dhe vendit duhet të bëjë përpjekje të mëjetjshme për të plotësuar 5 prioritetet kyçe”.
Johannes Hahn, komisioner për fqinjësinë dhe negociatat e anëtarësimit: « Shqipëria ka nevojë urgjente për të finalizuar reformën e sistemit zgjedhor, përafrimin e gjithë legjislacionit përkatës me rekomandimet e nxjerra nga OSBE-ODIHR. Për më tepër, integriteti në të gjithë sektorin publik duhet të forcohet më tej. Shumë është arritur tashmë përmes reformës së administratës publike. I ashtuquajturi procesi i dekriminalizimit ka nevojë për t’u çuar përpara. Punonjësit e administratës civile dhe zyrtarët e zgjedhur duhet të jenë subjekt i mekanizmit të monitorimit të parashikuar në ligj dhe t’ju nënshtrohen sanksioneve kur është e nevojshme”.
Eduard Kukan, eurodeputet: “Reforma zgjedhore është shumë e rëndësishme për zgjedhjet e përgjithshme të 2017. Shpresoj që partitë politike të gjejnë konsensus. Zbatimi i rekomandimeve të OSBE/ODHIR është kyç për të pasur zgjedhje të lira dhe të ndershme vitin e ardhshëm në Shqipëri”.
Krimi i organizuar dhe korrupsioni vazhdojnë të përbëjnë problemin kryesor në perceptimin jo vetëm të shteteve anëtare, por edhe të institucioneve europiane, duke u reflektuar rregullisht në çdo ndërhyrje të eurodeputetëve dhe jo vetëm.
Jeanine Hennis-Plasschaert, ministre e mbrojtjes së Holandës: « Nevojitet një gjurmë provash solide për hetimet, ndjekjet penale dhe dënimet në luftën kundër krimit të organizuar dhe korrupsionit në të gjitha nivelet ».
Ivan Jakovçiç, eurodeputet ( ALDE): « Dobësia e shtetit ligjor, korrupsioni dhe krimi i organizuar në Shqipëri janë kërcënim për Bashkimin Europian.
John Stuart Agneë, eurodeputet (EFD): « Kur Shqipëria të bëhet anëtare, kjo do të lehtësojë aktivitetin në zonën Shengen, ku shqiptarët janë tashmë të njohur për lehtësimin e krimit të organizuar dhe trafikun e qënieve njerëzore. Britani e madhe ka një prodhim kombëtar bruto për frymë dhjetë herë më të madh sesa Shqiëpria, një minimum rrogash dhe mbrojtjeje sociale që do t’i thithë shqiptarët në Britaninë e Madhe si një magnet. Po të isha student në Shqipëri do të marrja një biletë për në Londër dhe do të lutesha që Britania e Madhe të qëndronte në BE. Po të isha sot një kriminel në Shqipëri, do ta shihja anëtraësimin në BE si një pashaportë drejt parajsës.
Eurodeputetët këtë rradhë kanë venë theksin qartësisht tek problematika ekonomike dhe sociale në vend, që i shtyn qytetarët shqiptarë në shumë raste të braktisin Shqipërinë në mungesë të një perspektive pune dhe standarte normale jetese.
David Mcallister, eurodeputet (EPP): « Në shtypin gjerman lexova që 54.000 shqiptarë kanë kërkuar azil në Gjermani në 2015. Azikërkuesit nga Shqipëria renditen të dytët nga të gjithë azilërkuesit në Gjermani. Kjo nuk është gjë e mirë. Kjo do të thotë që Shqipëria duhet të bëjë reformat e nevojshme për të krijuar në një perspektivë të mirë sociale për të rinjtë për të qëndruar në vend ».
Boguslaë Liberadzki, (S&D) : “Ne duhet t’ju tërheqim vëmendjen miqëve tanë shqiptarë lidhur me çështjet ekonomike. Shqipëria duhet të arrijë standartet ekonomike të duhura para se të bëhet anëtare e BE-së dhe të zhvillojë gjithashtu politika sociale. Politikat ekonomike dhe sociale janë kyçe për qytetarët europianë.”
Në debat është venë theksi edhe te respektimi i të drejtave të njeriut dhe ai i minoriteteve.Institucionet europiane nuk harrojnë të theksojnë, se dialogu midis mazhorancës dhe opozitës është jetësor për progresin në reformat kyçe të Shqipërisë dhe integrimin europian të vendit. /abcNews/
