Arratia e Aldo alias Elidon Avdulajt, i shpallur në kërkim nga SPAK pas operacionit më 2 tetor, ku u godit grupi i Aleksandër Lahos (Rrumi i Shijakut) dhe i Astrit Avdylajt, ka zgjatur vetëm pak ditë pasi u vu në pranga mëngjesin e sotëm.
37-vjeçari u kap nga Forcat Renea dhe Operacionale në bashkëpunim me policinë e Durrësit, teksa fshihej në një apartament pranë Kopshtit Zoologjik në Tiranë.
Ndaj tij rëndojnë tre akuza: Vrasja me paramendim, kryer për hakmarrje, pastrim parash dhe armëmbajtje pa leje.
Aldo Avdylaj akuzohet se ka organizuar dhe bashkëdrejtuar grupin me Astrit Avdylajn për vrasjen e Edmir Bregut në vitin 2021 në Durrës.
Avdylaj rezulton i përfshirë në përgjime ku dëgjohet të thotë: “Unë vras 10 vetë, nëse thua ti”, një frazë që hedh dritë mbi strukturën hierarkike dhe mënyrën e funksionimit të grupit.
Vrasja e Edmir Bregut
Vrasja e Edmir Bregut u zbardh pas komunikimeve në Sky ECC të grupit të Rrumit të Shijakut dhe Astrit Avdylajt. Sipas SPAK, porositësi i vrasjes së Bregut ishte Astrit Avdylaj në shenjë hakmarrje për tentativën për të vrarë Aldon.
Si ekzekutorë vepruan Alfred Doka dhe Ermir Dedja. Doka është në kërkim, ndërsa Dedja u ekzekutua më 20 maj të këtij viti në Durrës.
Si ndihmës, SPAK akuzon edhe Enea Kumen, vëllain e deputetit të PS, Loer Kume.
Operacioni i SPAK
Më 2 Tetor, SPAK kreu një operacion që çoi në shkatërrimin e dy grupeve kriminale në Gjirin e Lalzit, grupit të Aleksandër Lahos (Rrumi i Shijakut) dhe i Astrit Avdylajt, të përfshirë në vrasje dhe në tjetërsime pronash përmes falsifikimit të dokumenteve.
Në kuadër të hetimit, u sekuestruan 11 pasuri me sipërfaqe totale 254.300 m², në zonën bregdetare të fshatit Shetaj, Durrës.
Në pranga u vunë 4 persona: Vullnet Muça, vëllai i Aleksandër Lahos, Enea Kume, vëllai i deputetit Loer Kume, Vlash Brahja dhe Astrit Avdylaj alias Astrit Balliu, i cili ndodhet në burg në kuadër të operacionit “Revanshi.
Aldo Avdylaj del në komunikimet e SkyEcc me Rrumin e Shijakut edhe për toka në Gjirin e Lalzit.
Në dosjen e SPAK, zbardhen edhe biseda të Aldo Avdylajt me xhaxhain Astrit Avdylajn ku ky i fundit e udhëzonte që të tregohej i kujdesshëm për “punët” që kryenin dhe të mos i merrnte vesh Rrumi i Shijakut.
PAMJE nga arrestimi i Aldo Avdylajt
Në videon e mëposhtme shihet momenti kur RENA mësyn në apartamentin ku ishte fshehur nipi i Astrit Avdylajt, Aldo Avdylaj. Ai dallohet i shtrirë në tokë dhe me pranga në duar.
Gjatë kontrolleve në apartamentin në Kopshtin Zologjik ku fshihej Aldo Avdylaj, u gjet edhe një armë poshtë jastëkut. Arma e gjetur në shtratin e Avdylajt është sekuestruar bashkë me municion luftarak.
“Në vijim të punës për lokalizimin, kapjen dhe ndalimin e personave të shpallur në kërkim, strukturat operacionale të Policisë, bazuar në informacionet e siguruara në rrugë operative, për një shtetas në kërkim, me rrezikshmëri të lartë shoqërore, organizuan dhe finalizuan operacionin policor të koduar “Ghosts”.
Në kuadër të operacionit, Forcat Operacionale të DVP Durrës, në bashkëpunim me DFPO dhe Forcat Speciale “RENEA”, në afërsi të Liqenit të Thatë, kapën dhe vunë në pranga shtetasin E. A. alias A. A., 37 vjeç, banues në Shijak.
Ky shtetas akuzohet nga GjKKO-ja, për veprat penale “Vrasja me paramendim”, kryer për hakmarrje, “Pastrimi i produkteve të veprës penale ose veprimtarisë kriminale”, të kryera në kuadër të grupit të strukturuar kriminal, si dhe “Mbajtja pa leje dhe prodhimi i armëve, armëve shpërthyese dhe i municionit”.
Materialet procedurale iu referuan SPAK-ut, për veprime të mëtejshme.”- njofton policia.
