Gjykata e Tiranës ka caktuar arrest në burg për Elvis Shkambin, autorin e vrasjes së gjyqtarit të Apelit, Astrit Kalaja, gjatë një seance gjyqësore për një çështje pronësie në Shkodër. Masa e njëjtë është vendosur edhe për xhaxhain e tij, Gjon Shkambin, dhe për rojën e sigurisë së gjykatës, Banush Koxhaj.
Seanca u zhvillua nën drejtimin e gjyqtares Marinela Osmani. Elvis Shkambi kërkoi falje publike ndaj familjes së gjyqtarit, duke deklaruar se vrasjen e ka kryer nën ndikimin e tronditjes psikike nga kalvari i gjatë i gjyqeve.
Ndërkohë, Gjon Shkambi, i akuzuar për “vrasje në rrethana të tjera cilësuese” të mbetur në tentativë, u shpreh në gjyq:
“Nuk kisha dijeni për veprimin e nipit, po dilja nga salla e gjyqit kur qëlloi gjyqtarin.”
Të dy të pandehurit kanë shprehur pakënaqësi ndaj sistemit gjyqësor, duke pretenduar se gjykatat nuk kanë dhënë zgjidhje ligjore për çështjen e pronësisë së pallatit që ata pretendojnë se është i tyre.
