Policia e Durrësit ka arrestuar dy punonjës të sigurisë në Portin e Durrësit, pasi akuzohen se kanë vjedhur një motomjet të importuar nga Zvicra, me vlerë rreth 2500 euro.
Sipas njoftimit zyrtar, dy të arrestuarit, të cilët kishin për detyrë ruajtjen dhe sigurimin e objektit të portit, dyshohet se kanë bashkëpunuar me njëri-tjetrin për të kryer vjedhjen.
Në pranga kanë rënë shtetasit I. F., 45 vjeç dhe G. D., 47 vjeç, të dy banues në Durrës.
“Shërbimet e Komisariatit të Policisë Durrës, në vijim të punës për kapjen e autorëve të veprimtarive kriminale në fushën e vjedhjeve, bazuar në informacionet e siguruara në rrugë operative, lokalizuan, kapën dhe vunë në pranga shtetasit I. F. dhe G. D., të cilët dyshohet se kanë vjedhur një motomjet të importuar nga Zvicra, në pronësi të shtetasit K. K.,” thuhet në njoftimin e policisë.
