Ka pasur shumë shqiptarë që e kanë çuar nëpër mend De Biasin gjatë kohës që Kosova i jepte leksion futbolli skuadrës së drejtuar nga Panucci.
Dhe ndoshta me të drejtë. Natyrisht, bëhej fjalë për një miqësore dhe nuk do të shqetësoheshim kaq shumë për një humbje, nëse Shqipëria do të kishte luajtur një futboll të kënaqshëm.
Por, në fakt Shqipëria nuk luan më futboll dhe kjo është një kambanë alarmi për të ardhmen.
Kombëtarja jonë nuk shkëlqente as në kohën e De Biasit, por të paktën ishte skuadër dhe e dinim se si do luanim. Tani asnjë nuk e di se si luan skuadra e Panuccit.
Giani De Biasin e masakronin për “katenaçion” e tij klasike, madje aq shumë sa nuk na bënte përshtypje se në miqësore mundnim edhe Francën.
Ish-tekniku i kuqezinjve ka folur në një intervistë për “Panorama Sport”, ku ka deklaruar se Panucci duhet lënë të punojë i qetë me Kombëtaren dhe duhet mbështetur.
Çfarë mendoni për ndeshjet e fundit që ka zhvilluar Shqipëria?
Pashë vetëm ndeshjen kundër Kosovës. Nuk e kam parë ndeshjen me Norvegjinë, sepse isha në komentin e ndeshjes së Italisë në Angli. Mendoj se ndeshja me Kosovën nuk mund të gjykohet sepse u luajt në fundin e sezonit dhe trajneri kërkonte të bënte eksperimente. Më mirë t’i bësh në këtë moment se sa të rrezikosh në ndeshje të rëndësishme siç janë ato të Ligës së Kombeve.
Ju keni biseduar pas ndeshjes me Dukën dhe me Panuccin. Çfarë iu thatë atyre?
Ju thashë të njëjtat gjëra që po ju them edhe juve. Duhet të shfrytëzojnë sa më mirë eksperiencën që ka kjo skuadër deri tani, por nëse duan të “rrezikojnë” diçka për të parë mangësitë e tyre dhe për të pasur ide më të qartë për lojtarët me të cilët do të luftojnë në kompeticione të rëndësishme, atëherë besoj se është vepruar drejt që është eksperimentuar me Kosovën. Unë e di se kur humb Kombëtarja shqiptare, nuk i pëlqen askujt kjo gjë dhe të parët që mërziten më tepër janë Panucci dhe Duka.
Ka një revoltë te tifozëve, kryesisht në rrjetet sociale, ku i kërkojnë Dukës që të kthejë De Biasin në krye të Kombëtares. A keni një mesazh për ta…?
Mendoj se Federata në këto vite ka punuar mirë dhe presidenti ka qenë gjithnjë një person shumë i kujdesshëm rreth asaj që ndodh. I kupton situatat me shumë inteligjencë dhe me siguri do të jetë duke punuar për të mirën e skuadrës. Nuk do ta bëja shumë alarmante situatën sepse besoj se Panucci ka ende mundësitë që të bëjë mirë në Shqipëri dhe ka edhe motivimin e duhur. Mendoj se duhet lënë i qetë dhe duhet mbështetur nga të gjithë tifozët që e duan kombëtaren.
