Kryeministri Edi Rama vijon të mbajë qëndrimin se është në interesin e Europës që Ballkani t’i bashkohet. “Është jetike për Europën, por edhe për Ballkanin. Duhet të jesh i verbër që të mos ta kuptosh”, tha Rama për AFP, gjatë vizitës në Paris.
Sipas tij, Shqipëria ka përmbushur të gjitha ato që duhet të përmbushë për hapjen e negociatave.
“Të gjithë janë dakord mbi fatin që Shqipëria ka bërë më shumë se çdo vend tjetër për t’u përgatitur për këto negociata. Është diçka që e meritojmë dhe nuk i kuptoj këto hezitime në lidhje me këtë çështje”, shton Rama.
Ndërsa e cilëson integrimin një faktor paqeje dhe stabiliteti në një rajon që nuk do të përjetojë sërish spektrin e luftës që ka përjetuar në të shkuarën.
“Ne jemi një vend i përbërë nga muslimanë dhe nga të krishterë, por feja jonë e përbashkët është Europa.
Ne besojmë fuqimisht tek Europa si një faktor paqeje dhe stabiliteti, besojmë në një bashkëjetesë miqësore dhe në një bashkëpunim të vazhdueshëm midis Europës dhe rajonit e vendit tim.
Mundet që qytetarët e Europës ta kenë harruar, pasi për ta lufta është vetëm një film bardh e zi në “Netflix”, por për ne që e kemi përjetuar, është diçka të cilën nuk duam ta përjetojmë kurrë më”, shton ai në referencë ndaj luftës së Kosovës në vitet 1998-99.
Përsa i përket negociatave, ne nuk po kërkojmë asgjë që nuk e kemi merituar. Nuk kërkojmë asnjë qindarkë nga ana e Bashkimit Europian, por vetëm këshilla për mënyrën se si të vijojmë reformat që na presin më tej”, thekson Rama.
