Në qendër të vëmendjes prej shumë kohësh tashmë, i diskutuar si një prej kandidatëve potencialë për të marrë drejtimin e pankinës së Italisë pas përfundimit të Europianit dhe largimit të Contes, për trajnerin e Kombëtares së Shqipërisë, Gianni De Biasi, nuk mund të mungonin fjalët e presidentit të Federatës Shqiptare të Futbollit, Armand Duka.
Ky i fundit, në një intervistë është shfaqur besimplotë për për vijimin e bashkëpunimit me De Biasin, ndonëse nuk ka kursyer apelin ndaj tij dhe vetë Federatës Italiane të Futbollit. “De Biazi ka një kontratë, pjesë e të cilës është një klauzolë, sipas të cilës kundrejt një pagese mund të prishet në mënyrë të njëanshme kontrata. Gjithsesi, nuk mendoj se është duke menduar edhe vetë De Biasi për këtë punë. Jeta është një dhe atij Europiani i ka ardhur në moshën 60 vjeç.
Nuk besoj se do t’i vijë shanci për ta pasur edhe herë të tjera dhe për ta shpërdoruar këtë që ka”, u shpreh Duka. Duka i bëri apel njëherësh De Biasit dhe Federatës Italiane të Futbollit. Kreu i institucionit më të lartë të futbollit në Shqipëri, Armand Duka, ka rezervuar edhe një apel në adresë të Federatës Italiane të Futbollit. “Federata italiane është aq etike dhe aq serioze sa t’i respektojë rregullat e lojës. Dhe rregullat e lojës janë që të mos kontaktosh një trajner apo futbollist që është me kontratë”, deklaroi presidenti Duka.
