Nëna e Cristiano Ronaldos, ka folur për të ardhmen e djalit të saj. Në një intervistë të dhënë për “SFR Sport”, Dolores Aveiro tha se vetë ishte e gatshme për të kaluar në Paris, por, nëse nuk vazhdon në Madrid, të ardhmen e karrierës së djalit të saj do ta shohë në Manchester, ku ai u shpall për herë të parë kampion europian dhe fitoi për herë të parë “Topin e Artë”.
“Unë e dua Parisin. Vij në këtë qytet kohë pas kohe. Hera e fundit ishte kur djali im fitoi “Topin e Artë” të fundit. U ndjeva shumë krenare. Çdo herë që vij në Francë, të gjithë më trajtojnë shumë mirë”, – iu përgjigj një pyetjeje rreth kryeqytetit francez dhe, lidhur me atë përgjigje, u mor në pyetje për të ardhmen e djalit të saj, nëse ai mund të vinte te PSG-ja: “Nëse ju them të vërtetën, nuk do të më pëlqente, por do të preferoja që ai të kthehej në Manchester”.
Kjo intervistë shton tymnajën e krijuar pas deklaratave të Cristiano Ronaldos në fund të finales së Ligës së Kampionëve, në të cilën ai tha se “kishte qenë shumë mirë për të luajtur me Real Madridin”, duke lënë të kuptohet se diçka do të ndryshojë në ditët e ardhshme.
PSG tundon Cristiano Ronaldon
Fjalët e Cristiano Ronaldos nga fusha e blertë e stadiumit të Kievit (ishte shumë bukur që të luaja me Real Madridin. Në ditët e ardhshme, unë do të flas…) nuk kanë rënë në vesh të shurdhër. Interesi është zgjuar për yllin portugez ndër klubet më të mëdha në Europë.
I pari që ka pasur dëshirë për të reaguar është PSG. Klubi francez e dëshiron CR7 dhe ia ka transmetuar këtë Real Madridit, tashmë. Kampionët e Ligue 1 kanë një ëndërr të madhe, të kenë një “trident” sulmues me Ronaldon, Neymar dhe Mbappé. Parizienët i ofrojnë portugezit një pagë prej 45 milionë eurosh neto, shumë e barabartë me atë që merr Messi te Barcelona.
Megjithatë, kjo dëshirë e presidentit Al Khelaifi ka dy pengesa. Nga njëra anë, vetë Real Madridi, që nuk do ta shesë yllin e vet, por kjo vlen për aq kohë sa ajo shërben për të hapur derën e daljes së Neymar drejt “Bernabeu”. Ronaldo ka një klauzolë 1.000 milionë euro, por çmimi që duhet të paguajë PSG nuk do të kalojë 150 milionë euro.
Problemi tjetër për klubin francez, për të nënshkruar me Cristiano Ronaldon, është hulumtimi, i cili është dorëzuar nga Komiteti i Kontrollit Financiar të UEFA-s në vazhdën e “dopingut financiar” të mundshëm në kontratat e tij të sponsorizimit.
Një sanksion si ai, që mori në vitin 2014, do të reduktojë ndjeshëm mundësitë e klubit francez në tregun e transferimeve. Cavani, Guedes dhe Di Maria janë tre nga emrat, tashmë në dalje nga “Parc des Princes” për të rritur të hollat, por, në mënyrë që të përballet me nënshkrimin e Cristiano Ronaldos, duhet të shesë më shumë.
