Gjykata e Posaçme kundër Korrupsionit dhe Krimit të Organizuar ka vendosur masën e sigurisë “arrest në shtëpi” për Irakli Lekën, shef i regjimit të brendshëm në burgun e Lushnjës.
Vendimi u dha nga gjyqtari Bib Ndreca. Leka u arrestua me urdhër të SPAK, nën akuzën për veprën penale “Korrupsioni pasiv i personave që ushtrojnë funksione publike”, parashikuar nga neni 259, paragrafi 2 i Kodit Penal.
Ai dyshohet se ka marrë para në këmbim të dhënies së lejeve të përkohshme për të burgosurit.
Rasti u denoncua në emisionin “Stop” më 16 shtator, pas denoncimeve të shumta që kishin ardhur në adresë të Lekës për marrje ryshfeti në këmbim të dhënies së lejeve. Në emision u transmetua një regjistrim me kamera të fshehtë për pazaret që bëhen nëpër burgje duke u shitur disa ditë leje të burgosurve me shuma të majme.
Emisioni inskenoi një rast në burgun e Fushë-Kosovës në Lushnje, ku kërkoi takim me shef Matin. Ky i fundit la menjëherë një takim në një lokal, mori 700 euro dhe premtoi 5-7 ditë leje për personin në fjalë. “Stop” dorëzoi paratë dhe e ndoqi çështjen deri në momentin e shumëpritur kur i burgosuri, doli për disa ditë nga qelia.
Menjëherë pas transmetimit, Shërbimi i Kontrollit të Brendshëm të Burgjeve, nën drejtimin e Prokurorisë Kundër Korrupsionit dhe Krimit të Organizuar, arrestoi shtetasin Irakli Leka, me detyrë Shef i Regjimit të Brendshëm në IEVP Lushnjë, ndërsa u pezullua nga detyra drejtori i këtij burgu Elvin Kurti, deri në sqarimin e rrethanave të ngjarjes, si dhe zëvendësi i tij.
