Gjykata e Fierit ka caktuar masat e sigurisë për gjashtë personat e arrestuar në kuadër të hetimit për skemën piramidale “XUEX”. Pas seancës së zhvilluar këtë të martë, gjykata vendosi që katër prej tyre të qëndrojnë në qeli për 60 ditë, ndërsa për dy të tjerët u dha masa më e lehtë, detyrim paraqitjeje.
Operacioni “XUEX” u zhvillua disa ditë më parë nga Policia e Shtetit dhe Prokuroria e Fierit, duke përfshirë kontrolle të shumta në qytete të ndryshme si Fier, Tiranë, Dibër, Berat dhe Gramsh. Gjatë aksionit u sekuestruan shuma të mëdha parash në lekë, euro dhe dollarë, si dhe u ngrinë gjashtë llogari bankare të lidhura me kriptomonedha. Hetimet zbuluan se grupi mashtronte qytetarët përmes platformave të rreme online, ku u premtonte fitime të shpejta nga investimet në monedha virtuale si USDT dhe TRON.
Sipas prokurorisë, personat e përfshirë rekrutonin viktima kryesisht përmes rrjeteve sociale dhe aplikacioneve të komunikimit si Telegram, duke përdorur metoda tipike të një skeme piramidale. Viktimat nxisnin njëra-tjetrën të sillnin anëtarë të rinj me premtimin e fitimeve të larta, ndërsa në realitet paratë përfundonin në llogaritë e organizatorëve.
Mes të arrestuarve janë Arbër Çela, Emanuel Taullahu, Flavio Mukaj, Marius Kodra, Brunilda Todi dhe Brunilda Ndini, ndërsa dy persona të tjerë janë shpallur në kërkim. Prokuroria e Fierit ka ngritur ndaj tyre akuza për mashtrim dhe pastrim parash, ndërsa hetimet pritet të zgjerojnë rrethin e personave të përfshirë në këtë rrjet.
