Presidentja e Komisionit Evropian, Ursula von der Leyen, dhe kryeministri polak, Donald Tusk, vizituan të dielën kufirin polako-bjellorus, ku diskutuam mbi mbrojtjen dhe sigurinë në rajonin lindor të Evropës.
Von der Leyen siguroi Tuskun dhe qytetarët polakë për solidaritetin e plotë të Bashkimit Evropian me Poloninë, duke theksuar rëndësinë e presionit të vazhdueshëm ndaj presidentit rus, Vladimir Putin. Ajo e përshkroi Putinin si një “grabitqar” dhe tha se ai mund të mbahet nën kontroll vetëm përmes parandalimit të fortë.
Vizita e Von der Leyen bëhet pjesë e një turneu katër-ditor në shtetet evropiane që kufizohen me Rusinë dhe Bjellorusinë, me qëllim të tregojë mbështetje për vendet kufitare dhe zhvillimin e industrisë mbrojtëse të Evropës.
Kufiri polako-bjellorus ka qenë burim polemikash që nga kriza migratore e vitit 2021, të cilën Polonia e ka quajtur “luftë hibride” të orkestruar nga Bjellorusia.
Donald Tusk njoftoi gjithashtu planet për investime të mëdha ushtarake në vitin e ardhshëm, duke parashikuar 200 miliardë PLN (rreth 47 miliardë euro) për forcimin e ushtrisë dhe industrisë mbrojtëse polake. Ai nënvizoi rëndësinë që të gjitha vendet e BE-së të marrin seriozisht sigurinë e kufirit lindor dhe të mbajnë një qëndrim të fortë ndaj Rusisë.
