Shefi i përkohshëm i NASA-s, Sean Duffy, ka urdhëruar agjencinë hapësinore amerikane të përshpejtojë planet për vendosjen e një reaktori bërthamor në sipërfaqen e Hënës, me synim furnizimin e misioneve të eksplorimit dhe krijimin e një baze të përhershme.
Sipas një udhëzimi të datës 31 korrik, të siguruar nga CNN, kjo lëvizje synon ta mbajë SHBA-në përpara Kinës dhe Rusisë, të cilat kanë shpallur disa herë planet e tyre për një projekt të përbashkët të këtij lloji deri në mesin e viteve 2030.
Duffy paralajmëroi se, nëse një vend tjetër e realizon i pari këtë arritje, mund të shpallë një “zonë të ndaluar” në Hënë, duke penguar planet amerikane përmes programit “Artemis”.
Misioni “Artemis III”, i planifikuar për vitin 2027, synon të rikthejë njerëzit në Hënë për herë të parë pas më shumë se 50 vitesh, por programi ende ka disa sfida përpara. “Jemi në një garë për në Hënë, në një garë me Kinën. Dhe për të pasur një bazë në Hënë, na duhet energji,” deklaroi Duffy.
Udhëzimi kërkon emërimin brenda 30 ditësh të një drejtuesi ekzekutiv për projektin. NASA ka bashkëpunuar më parë me Departamentin e Energjisë për projekte të ngjashme, përfshirë sistemin e energjisë nga fisioni që mund të prodhojë të paktën 40 kilovat energji — mjaftueshëm për të furnizuar 30 shtëpi për një dekadë. Megjithatë, për operacione afatgjata në Hënë, nevojiten të paktën 100 kWe.
Një reaktor bërthamor do të ishte vendimtar për misionet e gjata në Hënë dhe do të shërbente si bazë teknologjike për eksplorimin e Marsit. “Nëse duam të mbajmë jetë në Hënë dhe të shkojmë më pas në Mars, kjo teknologji është jetike, Amerika do të jetë vendi I pare që vendos energji në Hënë” theksoi Duffy.
Ky është udhëzimi i parë i madh i Duffy-t që prej marrjes së detyrës në korrik, krahas postit të Sekretarit të Transportit, për të cilin është kritikuar.
Ai gjithashtu ka urdhëruar përshpejtimin e përpjekjeve për ndërtimin e një stacioni hapësinor komercial që do të zëvendësojë Stacionin Ndërkombëtar Hapësinor, i cili pritet të dalë jashtë përdorimit deri në vitin 2030.
