Shqipëria po përjeton një situatë dramatike nga zjarret, ku janë regjistruar mbi 50 vatra, ndërkohë që aktualisht po digjen 6 fshatra në Gramsh dhe një në Poliçan. Po ashtu, zjarri ka shkaktuar sot dhe një viktimë dhe disa të plagosur, ndërsa për disa banorë të tjerë fati nuk dihet ende.
Lidhur me këtë situatë të rëndë, ka ardhur një reagim edhe nga deputetja e PD-së, Jorida Tabaku, e cil shprehet se përballë fatkeqësive të tilla, shteti mbetet i pafuqishëm, pa mjetet dhe infrastrukturën e domosdoshme për t’i përballuar.
Në një postim në rrjetet sociale, Tabaku shkruan se pas çdo vere dhe pas çdo tragjedie, dëgjojmë të njëjtat premtime për blerje helikopterësh dhe investime në pajisje, por vit pas viti, ato mbeten vetëm fjalë.
Postimi i plotë:
“Këtë vit, Shqipëria është përballur me një bilanc të rëndë nga zjarret: pas Borshit, Kaninës, Vlorës, tashmë edhe Gramshit e Tiranës. Është e dhimbshme të shohësh se, përballë fatkeqësive të tilla, shteti mbetet i pafuqishëm, pa mjetet dhe infrastrukturën e domosdoshme për t’i përballuar.
Çdo verë, pas çdo tragjedie, dëgjojmë të njëjtat premtime për blerje helikopterësh dhe investime në pajisje. Por vit pas viti, ato mbeten vetëm fjalë, ndërsa flakët përpijnë pyje, shtëpi e jetë njerëzish. Menaxhimi i këtij sezoni turistik ka treguar se, nga turizmi te emergjencat, mungon një strategji serioze dhe funksionale.
Punonjësit që luftojnë me zjarrin meritojnë mirënjohje të veçantë: në kushte ekstreme dhe temperatura përvëluese, ata punojnë me përkushtim në vijën e parë të rrezikut. Por sakrifica e tyre nuk mund të zëvendësojë përgjegjësinë e shtetit.”
